Ытыктабылаах Аҕа дойду Улуу сэриитин бэтэрээннэрэ, тыылга фронт туһугар Кыайыыны уһансы...
Ытыктабылаах Аҕа дойду Улуу сэриитин бэтэрээннэрэ, тыылга фронт туһугар Кыайыыны уһансыбыт килбиэннээх көлүөнэ тыыннаах туоһулара, сэрии сылларын оҕолоро, Үөһээ Бүлүү улууһун бука бары олохтоохторо! «Үөһээ Бүлүү улууһа (оройуона)» муниципальнай оройуон дьаһалтатын аатыттан уонна тус бэйэм ааппыттан Улуу Кыайыы ытык бырааһынньыгынан эһигини ис сүрэхтэн итиитик-истиҥник эҕэрдэлиибин! Бу күн – биһиги норуоппут хорсун быһыытын, дьулуурун уонна сэриигэ өлбүт-сүппүт дьоруойдарбыт сырдык кэриэһин бэлиэтэ. Кыайыыны уһансыбыт көлүөнэҕэ сүгүрүйэбит. Кинилэр бэйэлэрин харыстаммакка, олохторун толук ууран туран биһиэхэ эйэлээх олоҕу бэлэхтээбиттэрэ. Ким да умнуллубат! Туох да умнуллубат! Өрөгөйдөөх Кыайыыбыт туһугар Саха сирин, ол иһигэр Үөһээ Бүлүү улууһун олохтоохторо туохха да тэӈнэммэт сүдү кылааты киллэрбиттэрэ, олохторун толук ууран эйэлээх олоҕу ситиспиттэрэ. Ол курдук: • Бүтүн Саха Сириттэн сэриигэ Аҕа дойдуну көмүскүү 62.000 кэриҥэ киһи ыҥырыллан барбыта. • Онтон Үөһээ Бүлүү улууһуттан 2163 киһи сэриигэ ыҥырыллан Аҕа дойдуну көмүскүү барбыттара. • Үлэ фронугар Кыайыыны уһанса 286 киһи биһиги улууспутуттан сылдьыбыттара. • Уоттаах сэрии хонуутугар, дойду туһугар 1131 саллаат олохторун толук уурбуттара. • Сэрииттэн тыыннаах 786 биир дойдулаахтарбыт эргиллэн кэлбиттэрэ. Маны сэргэ Кыайыы туһугар Үөһээ Бүлүү улууһун дьоно-сэргэтэ сэрии фондатыгар – 2.794.429 солк. харчынан биэрбиттэрэ. Кыһыл, үрүҥ көмүһүнэн – 29 кг туттарбыттара. Аҕа дойду сэриитигэр Үөһээ Бүлүү улууһуттан үгүс биир дойдулаахтарбыт бойобуой наҕараадаларынан бэлиэтэммиттэрэ: • «Аҕа дойду сэриитэ» 1,2 степэнинэн – Павлов Владимир Спиридонович наҕараадаламмыта; • «Аҕа дойду сэриитэ» 2-с степэнинэн – 12 киһи; • «Слава» 3 степэнинэн – 24 киһи; • «Кыһыл сулус» орденынан – 23 киһи; • «Хорсунун иһин» (За отвагу) мэтээлинэн – 52 киһи наҕараадаламмыттара. • Тыыл үлэтигэр «Килбиэннээх үлэтин иһин» мэтээлинэн – 1489 киһи наҕараадаламмыта. Билигин даҕаны буола турар анал байыаннай дьайыыга, Аҕа дойду сэриитигэр фашистары кыайбыт көлүөнэ сиэннэрэ, хос сиэннэрэ, фашист-немецтэри утары сэриилэспит хонууларга аны украина-фашистары утары охсуһаллар. 1945 сыллаахха фашиһы суулларан Кыайыыны ситиспиппит курдук, сотору кэминэн саҥа Кыайыы хайаан даҕаны кэлиэ, уолаттарбыт дойдуларыгар эргиллэн кэлиэхтэрэ диэн итэҕэллээхпит, эрэллээхпит. Бу күн махтанабыт Аҕа дойду сэриитигэр Кыайыыны уһансыбыт көлүөнэҕэ! Хаһан да умнуо суохпут кинилэр сиэртибэлэрин, кылааттарын, дьоруойдуу быһыыларын! Махтанабыт билигин дойдубутун көмүскүү сылдьар байыас уолаттарбытыгар! Кыайыы хайаан да биһиэнэ буолуо! Кэтэһэбит! Эрэнэбит! Өйүүбүт! Барыгытыгар чэгиэн доруобуйаны, эйэлээх халлааны, дьолу-соргуну баҕарабын! Ытыктабылы кытта, Үөһээ Бүлүү улууһун баһылыга В.В. Николаев #КыайыыКүнэ #ДеньПобелы