Кичәге очрашуда бик файдалы, уйландырырлык темага сөйләшеп алдык. — 23 сентября 2026 г. в 06:39:40.911
Кичәге очрашуда бик файдалы, уйландырырлык темага сөйләшеп алдык. Кайчак без уйларга мөмкинбез: «Мин намазда, уразада, мәчеткә йөрим, яулыктан... Димәк, мин котылдым, җәннәт минеке». Бу — шәйтанның иң куркыныч тозагы. Диндә булучы һәрбер кешегә соңгы сулышына кадәр уяу булырга кирәк, чөнки безнең төп дошманыбыз җаныбыз чыкканчы бирешми. Иң куркынычы — үлем түшәгендә көтә. Кеше хәлсезләнгән, сулышы кысылган, тирә-яктагыларны ишетми башлаган мизгелдә шәйтан аның янына килә. Ул дөньядагы иң кадерле кешеләре (әти-әнисе, якыннары) сүрәтендә килеп: «Без сине яратабыз, бу дин дөрес түгел, икенче юлны сайла, без сиңа ярдәм итәбез», — дип вәсвәсә кылырга мөмкин. Әгәр кеше шушы соңгы секундта алданса, аның гомер буе кылган намазлары, тоткан уразалары юкка чыгачак. Кеше имансыз китәчәк. Пәйгәмбәребез (с.г.в.) әйткәнчә: «Гамәлләр соңгысы белән бәяләнә». Динебезне саклап калу өчен ике төп корал бар: 1️⃣ Безне туры юлга керткән өчен Раббыбызны һәрвакыт мактарга тиешбез(шөкер) . Кичә гыйбадәттә булган кешенең бүген диннән чыгуы бар. Иманны Аллаһ кына саклый ала. 2⃣ Аллаһтан иманыбызны, динебезне ныгытуны сорау (Дога). Пәйгамбәребезнең (с.г.в.) еш укыган догасында: «Йә, йөрәкләрне әйләндерүче Аллаһ! Минем йөрәгемне Үзеңнең динеңдә ныгыт!» — дип сорый иде. Раббыбыз безгә соңгы сүзебезне «Лә иләһә илләЛлаһ» дип әйтергә насыйп итсен!