1 сентябрьыште Т.Евсеев лӱмеш калыкле тоштерыште «Первозданная Россия» ончер почылтеш.
1 сентябрьыште Т.Евсеев лӱмеш калыкле тоштерыште «Первозданная Россия» ончер почылтеш. Тудым тыгаяк лӱман XIII фестивальын иктешлымашыжым шотыш налын ямдылыме. Ончерыште профессионал, тыглай фотограф-влакын 30 пашаштым ужаш йӧн лиеш. Фестиваль 2014 ий гыч эртаралтеш да шке йырже талантан автор-влакым кажне ийын шукырак да шукырак чумыра. Фестивальын тӱҥ шонымашыже – элнан мотор, ойыртемалтше, тӱрлӧ шӧрынан пӱртӱсшым фотокамерын объективше гоч почын пуаш. Тылзе жапыште тӱҥ экспозиций Москошто вераҥдалтеш, а вара Российын регионлаштыже ончыкталтеш. Марий Эл Республикысе Т.Евсеев лӱмеш калыкле тоштерыште тыгай сынан ончер ынде 2018 ий гыч ончыкталтеш. Калык да республикысе уна-влак тиде выставкым посна событий семын вучат. Тений проект у шӱлышан лиеш. Пӱртӱс фото дене пырля республикысе тоштерын фондыштыжо аралалтше пӱртӱс экспонат-шамыч ончыкталташ тӱҥалыт. Экспозицийым кок блоклан шелме. «Российысе эҥерлан корныж дене» ужаш ончышо-влакым элнан эҥерлаж мучко шкешотан путешествийыш наҥгая. «Российын Йошкар книгаже» ужаш шуэн вашлиялтше да йомшо янлык ден кушкыл-шамычлан пӧлеклалтын. Ончерым почмо годым Федераций Совет председательын алмаштышыже, «Первозданная Россия» общероссийский фестивальын оргкомитетшын председательже Константин Косачев дене вашлиймаш лиеш. Фотошто 2025 ийысе ончер ончыкталтын. Михаил Скобелевын фотожо/ "Марий Эл" увер агентстве.