Көрүүтэ-истиитэ суох бэйдиэ сылдьар ыт — дьон эппиэтинэһэ суох сыһыана — 24 августа 2026 г. в 03:36:59.594
Көрүүтэ-истиитэ суох бэйдиэ сылдьар ыт — дьон эппиэтинэһэ суох сыһыана Атырдьах ыйын 21 күнүгэр Нам сэлиэнньэтигэр уонна Хамаҕатта нэһилиэгэр бэйдиэ сылдьар ыттары хонтуруоллуур уонна сэрэтэр-профилактическай үлэни ыытар сыаллаах рейдэ ыытылынна. Рейдэҕэ «Нам улууһа» МО дьаһалтатын экологияҕа уонна айылҕаны туһаныыга кылаабынай специалиһа Гаврил Леонтьев, административнай комиссия специалиһа Александра Колмогорова, Намнааҕы ветеринарнай сулууспа старшай инспектора Анита Румянцева уонна полиция участковай инспектора кытыннылар. Рейдэ кэмигэр ыттарын бэйдиэ ыыппыт, көрүүтэ-истиитэ суох сырытыннарар хаһаайыттары кытта РФ сокуонун ирдэбиллэрин тутуһуу туһунан өйдөтөр-сырдатар иһитиннэриилэр ыытылыннылар, анал памяткалар туттарылыннылар. Бөлөх Хамаҕатта нэһилиэгин дьаһалтатыгар сылдьан, олохтоох дьаһалта салалтатын кытта дьиэ кыылларын иитиигэ, көрүүгэ-истиигэ сокуоннай ирдэбиллэри олоххо киллэрии боппуруостарын туһунан кэпсэттэ. Гаврил Романович Леонтьев - «Нам улууһа» МО дьаһалтатын экологияҕа уонна айылҕаны туһаныыга кылаабынай специалиһа: — Улууска көрүүтэ-истиитэ суох ыттары бэрээдэктээһин үлэтэ быыстала суох ыытыллар. Хомойуох иһин, сорох дьон дьиэ кыылыгар эппиэтинэһэ суох сыһыаннаһаллар. Ол эбэтэр ыттарын босхо ыыталлар, саҥа төрөөбүт ыт, куоска оҕолорун хордуон дьааһыкка уган баран, уопсай дьиэлэр көрүдүөрдэригэр, анныларыгар, маҕаһыыннар иннилэригэр, уулуссаҕа ууран хаалларар түгэннэрэ тахсаллар. Хаһаайын дьиэ кыылын иитэ ыларыгар № 498-дээх Федеральнай сокуонунан эппиэтинэһи барытын бэйэтэ сүгэр. Российскай Федерация Уголовнай кодексын 245-ис статьятынан дьиэ кыылыгар куһаҕаннык сыһыаннаһыы түгэнигэр хаһаайын эппиэтинэскэ тардыллыан сөп. ⤵️