СВО кыттыылаахтарын дьиэ кэргэттэригэр анал тренинг ыытылынна — 28 августа 2026 г. в 07:35:56.229
СВО кыттыылаахтарын дьиэ кэргэттэригэр анал тренинг ыытылынна Улуус киинигэр анал байыаннай дьайыы (СВО) кыттыылаахтарын кэргэттэригэр, ийэлэригэр уонна чугас дьонугар анаммыт уйулҕа (психологическай) көмөтүн уонна реабилитациятын тренинэ ыытылынна. Тэрээһин сүрүн ыалдьытынан уонна ыытааччытынан өрөспүүбүлүкэҕэ эрэ буолбакка, федеральнай таһымҥа биллэр уопуттаах уйулҕа үөрэхтээҕэ (психолог) — Санкт-Петербург куораттааҕы «Иматон» практическай уйулҕа үөрэҕин институтун лектора, системнай уонна полевой терапевт, «Луч» аныгы расстановкалар кииннэрин дириэктэрэ Татьяна Васильевна Сабарайкина буолла. Тренинг сүрүн сыалынан байыаннай сулууспалаахтар чугас дьоно ис санааларын үллэстэллэригэр, уйулҕа өттүнэн чэпчииллэригэр уонна ис күүстэрин (ресурстарын) уһугуннаралларыгар көмөлөһүү буолла. Ону тэҥэ, «Луч» аныгы расстановкалар кииннэригэр бииргэ үлэлиир уонна тэрийсэр уйулҕа үөрэхтээҕэ (психолог) Сарыал Валерьевич Габышев дьарык практическай тренин чааһын ыытыста. Кинилэр иккиэн бэйэлэрин уопуттарынан, туһалаах сүбэлэринэн уонна анал ньымаларынан хас биирдии кыттааччыга күүс-көмө буоллулар. Практическай дьарыктар устата кыттааччылар уоскутунар уонна ис күүһү чөлгө түһэрэр араас хамсаныылары, анал эрчиллиилэри оҥордулар. Кинилэр ис туруктарын хайдах уоскутунары, хараастыыны хайдах кыайары уонна дьиэ кэргэҥҥэ эрэллээх эйгэни хайдах үөскэтэр туһунан туһалаах сүбэлэри ыллылар. Бу суолталаах тэрээһини Нам улууһун дьаһалтатын дьиэ кэргэн уонна ыччат политикатын отдела (салайааччы Екатерина Евстафьева) уонна Анал байыаннай дьайыы кыттыылаахтарын дьиэ кэргэттэригэр көмө оҥорор улуустааҕы Комитет (КСВО, салайааччы Майя Софронова) холбоһон тэрийдилэр. Кыттааччылар тэрийээччилэргэ уонна Татьяна Васильевнаҕа, Сарыал Валерьевичка маннык наадалаах, дууһаны уоскутар уонна күүс-уох угар көрсүһүүнү тэрийбиттэрин иһин ис сүрэхтэриттэн махтаннылар. «Нам улууһа» МО пресс-сулууспата