Тыа хаһаайыстыбатын өйүүр программаларга киирбит уларыйыылары уонна саҥа граны билиһинн...
Тыа хаһаайыстыбатын өйүүр программаларга киирбит уларыйыылары уонна саҥа граны билиһиннэрэр семинар буолла Тыа хаһаайыстыбатын салаатыгар билигин үлэлии сылдьар урбаанньыттарга, фермердарга уонна бэйэ дьыалатын саҥаттан тэриниэн баҕалаахтарга аналлаах семинар ыытылынна. Тэрээһин кыттыылаахтара «Агромотиватор» уонна «Кыра агробизнеһы өйөөһүн» программалар чэрчилэринэн государствоттан көмө харчы (грант) ылыы саҥа усулуобуйатын, балаһыанньатын кытта билистилэр. Семинарга уопсайа 15 киһи кытынна. Тэрээһин модераторынан Саха сиринээҕи Бааһынай (фермерскай) хаһаайыстыбаларын уонна тыа хаһаайыстыбатын кооперативтарын Ассоциациятын (АККОР) толорооччу дириэктэрэ Зарема Бочкарева буолла. Кини государственнай өйөбүл балаһыанньата уларыйыыларын, ирдэбиллэрин судургутук уонна тиийимтиэтик кэпсээтэ, кыттааччылар ыйытыыларыгар сиһилии эппиэттээтэ. Семинар 10 кыттааччыта — билигин үлэлии сылдьар урбаанньыттар (предпринимателлэр) уонна бааһынай (фермерскай) хаһаайыстыбалар буолаллар. Кинилэр «Кыра агробизнеһы өйөөһүн» программа усулуобуйатыгар киирбит тиһэх уларыйыылары билсэр уонна салгыы государствоттан көмөнү ылар сыаллаах иһиттилэр. Тэрээһин биир сүрүн чааһынан «Агромотиватор» программатын билиһиннэрии уонна ырытыы буолла. Бу анал байыаннай дьайыы (СВО) бэтэрээннэригэр уонна кыттыылаахтарыгар тыа хаһаайыстыбатын эйгэтигэр бэйэ дьыалатын саҥаттан арынарыгар эбэтэр баар ферманы сайыннарарыгар анаммыт грант буолар. Бу программа РФ Тыатын хаһаайыстыбатын министиэристибэтин кыра агробизнеһы өйүүр саҥардыллыбыт систиэмэтигэр киирэр. Семинарга «Агромотиватор» программаҕа кыттар баҕалаах улуус нэһилиэктэриттэн 5 СВО кыттыылааҕа сырытта: Түбэттэн — 1 киһи, Хатырыктан — 1 киһи, Никольскайтан — 1 киһи, Үөдэйтэн — 2 киһи. Улуустааҕы тыа хаһаайыстыбатын управлениетын начальнигын солбуйааччы Юрий Петров иһитиннэрбитинэн, сотору кэминэн «Агромотиватор» программа балаһыанньата бигэргэтилиннэҕинэ официальнай куонкурус биллэриллиэҕэ. Билигин бэлэмнэнии уонна докумуоннары хомуйуу үлэтэ бара турар. Баҕалаах кыттааччыларга бизнес былаан суруйалларыгар тыа хаһаайыстыбатын управлениетын өттүттэн тустаах консультация уонна көмө оҥоһуллуоҕа – диэтэ Юрий Владимирович. «Нам улууһа» МО пресс-сулууспата