УЛУУС БАҺЫЛЫГЫН ПЛАНЕРКАТЫТТАН СОНУННАР
УЛУУС БАҺЫЛЫГЫН ПЛАНЕРКАТЫТТАН СОНУННАР Улуус баһылыгын э.т. Анатолий Павлов бүгүн, балаҕан ыйын 14 күнүгэр, сарсыарда 9:00 чаастан улуус тэрилтэлэрин уонна дьаһалта отделларын, управлениеларын салайааччыларын кытта, оттон күн иккис аҥарыгар 14:00 чаастан нэһилиэк баһылыктарын кытта планерка мунньахтарын салайан ыытта. ✅«Намкоммунтеплоэнерго» АО генеральнай директора Николай Игнатьев оттук сезона балаҕан ыйын 9 күнүттэн саҕаламмытын туһунан иһитиннэрдэ. Бары объектарга итии 100% холбоммут. ✅Улуустааҕы үөрэх управлениетын салайааччыта Мария Игнатьева иһитиннэрбитинэн, үөрэх тэрилтэлэрэ уонна оҕо уһуйааннара сылыйаннар, бу күнтэн үөрэх толору штатнай режиминэн саҕаланна. 2026–2027 үөрэх сылыгар улуус үрдүнэн 4080 оҕо үөрэниэҕэ. Бу көрдөрүү ааспыт сылы кытта тэҥнээтэххэ, 111 үөрэнээччинэн аҕыйах. Бастакы кылааска киирээччи 50, оҕо уһуйааныгар сылдьааччы 60-ча оҕонон аҕыйаабыт. Бу күннэргэ улууспут оскуолаларыгар педагогическай Сэбиэттэр үлэлииллэр. Сүрүн сыал— саҥа 2026-2027 үөрэх сылыгар кэлэр соруктары уонна былааннары чопчулааһын. Билигин ОГЭ, ЕГЭ хат туттарыыта ыытыллар. ✅Улуустааҕы тыа хаһаайыстыбатын управлениетын начальнигын солбуйааччы Юрий Петров иһитиннэрбитинэн, бу күн туругунан оттооһун былаана 95,0 %, оттон сиилэһи угуу 77,0 % туолан иһэр. Сенаж бүгүҥҥү күҥҥэ 10 туонна, ол эбэтэр былаантан 1,81 % бэлэмнэммит. Бааһынай хаһаайыстыбаларга хортуоппуй хомуура салҕанар. Билигин барыта 94,0 га бааһына хортуоппуй (45,4 %) хомулунна. Оҕуруот аһа хомулла илик – диэтэ. ✅«Нам улууһа» МО Сир уонна баай-дуол сыһыаннаһыыларын комитетын дириэктэрэ Святослав Белолюбскай иһитиннэрбитинэн, социальнай газификация программатынан уопсайа 65 дуогабар түһэрсиллибиттэн, 62 дьиэ тиэргэнигэр диэри стояктар туруорулуннулар. Ону таһынан, 50 проектыыр-смета докумуона бэлэмнэннэ уонна 22 дьиэҕэ гаас холбонно. Улуус баһылыгын э.т Анатолий Иванович социальнай газификация үлэтин түргэтэргэ сорудахтаата. Үлэ түмүктэнэрэ олохтоохтор докумуоннарын уонна дьиэ иһинээҕи үлэлэрин төһө түргэнник ситэрэллэриттэн быһаччы тутулуктаах. ✅ КУМИ салайааччыта Святослав Белолюбскай балаҕан ыйын 16 күнүгэр 17:00 чаастан М.К. Аммосов аатынан Култуура уонна духуобунай сайдыы дыбарыаһыгар анал байыаннай дьайыы (СВО) кыттыылаахтарыгар уонна кинилэр дьиэ кэргэттэригэр уһаайбалары түҥэтии жеребьевката буоларын нэһилиэк баһылыктарыгар иһитиннэрдэ. ✅Бу чэппиэргэ, балаҕан ыйын 16 күнүгэр, Нам улууһун кыраныыссатыттан саҕалаан, кыстыкка киириэх иннинэ улуус үрдүнэн «Ыраас чэппиэр» (Чистый четверг) акция чэрчитинэн уопсай субуотунньуктар ыытыллыахтара. Бу тэрээһиҥҥэ хас биирдии нэһилиэк, тэрилтэлэр, түөлбэлэр уонна общественнай хамсааһыннар тахсан, көхтөөх кыттыыны ылыахтара. «Ленскэй нэһилиэк” ТСТ баһылыга Петр Сокольников Нам сэлиэнньэтин иһигэр ыытыллыахтаах субуотунньук кэмигэр хас биирдии тэрилтэ ханнык сири ыраастыахтааҕын туһунан сиһилии кэпсээтэ. ⤵