Юрий Слепцов: “Бүгүн биһиги Чурапчы улууһун махталлаах дьоно И.Е. Винокуров сырдык ааты...
Юрий Слепцов: “Бүгүн биһиги Чурапчы улууһун махталлаах дьоно И.Е. Винокуров сырдык аатыгар сүгүрүйэн өйдөбүнньүк дуоска арыйар үөрүүлээх түгэннэригэр олус долгуйан туран кыттыыны ыла кэллибит. Илья Егорович Винокуров олоҕо-дьаһаҕа, үлэтэ-хамнаһа – бу салайааччы норуота, хас биирдии киһи тыыннаах хааларын, этэҥҥэ буолуутун туһугар оччотооҕу история кэрдиис кэмин таба өйдөөн сөптөөх быһаарыныылары ылыныытын чаҕылхай холобура буолар. И.Е. Винокуров олоҕун саамай улахан дьыалатынан Аҕа дойду Улуу сэриитин кэмигэр саха норуотун аччыктааһынтан быыһаабыт улахан үтүөтэ буолар. Илья Егорович Винокуров хоргуйуу, сэрии сылларыгар аччыктааһыны кытта тэҥэ суох охсуһууну ыыппыта. Республика салайааччыларыттан, бу утарылаһыыга соҕотох кэриэтэ этэ. Фронтан 20 тыһыынчаттан тахса буойун төннүбэтэх буоллаҕына, ол сылларга хоргуйууттан, ыарыыттан, тыылга өлбүт дьону киллэрэн туран, 60 тыһыынча саха киһитэ тыына быстыбыта. Сэрии, сут-кураан энчирэппит Чурапчы оройуонун 41 колхуоһун дьоно 1942 сыллаахха аны хоту улуустарга күүс өттүнэн көһөрүллүбүттэрэ. Кэрээнэ суох дьаһалы утаран оччотооҕу салалтаттан Илья Егорович Винокуров күүскэ туруорсан 1945 с. көтүттэрбитэ. Онон Чурапчы көһүүтүн кыттыылаахтара дойдуларыгар төннүбүттэрэ. И.Е. Винокуров норуотугар кыһамньытын норуот умнубатаҕа. История ыар чахчытын, күһэйэн көһөрүү, мөлтөх дьаһал буолбутун республика таһымыгар үрдүкү салалта 1991 сыллаахха билиммитэ. И.Е. Винокуров саха норуотун хоргуйууттан өрүһүйүүтүн үүнэр көлүөнэҕэ тириэрдэр биһиги ытык иэспит”. Нам улууһун “Туллук хаара” ырыа айааччылар түмсүүлэрин салайааччыта Андрей Замятин Юрий Потапов-Саргын тылларыгар, бэйэтин матыыбыгар «Туойуоҕуҥ Ылдьааны” ырыаны бэлэх уунна. Салгыы делегация Чурапчытааҕы А.А. Саввин аатынан история уонна этнография музейыгар Көһөрүү сылларыгар анаммыт музей уруогар кыттыыны ылла. Манна Юрий Иннокентьевич оскуола үөрэнээччилэрин, уопсастыбаннас бэрэстэбиитэллэрин кытта көрсөн Илья Егорович Винокуров олоҕун, үлэтин-хамнаһын, Чурапчы дьоно дойдуларыгар эргиллэн кэлэллэрин туһугар оҥорбут сүдү үтүөтүн махтана ахтан-санаан аастылар. Нам улууһун дьаһалтата, дьоно-сэргэтэ, общественноһа Чурапчы улууһун баһылыгар Степан Саргыдаевка, дьонугар-сэргэтигэр киэн туттар биир дойдулаахпыт, уһулуччулаах государственнай уонна политическай деятель Илья Егорович Винокуров сырдык аатын, норуотугар оҥорбут үтүөтүн үйэтитиигэ ыытар үлэлэрин иһин барҕа махталларын тиэрдэллэр. Инникитин даҕаны саха норуотун чаҕылхай уола И.Е. Винокуров олоҕун, үлэтин-хамнаһын үйэтитиигэ биир санаанан үлэлэһиэхпит диэн бигэ эрэллээхпит. Андрей Замятин хаартыскаҕа түһэриилэрэ туһанылыннылар. “Нам улууһа” МО пресс-сулууспата