Күндү үөрэнээччилэр, устудьуоннар!
Күндү үөрэнээччилэр, устудьуоннар! Ытыктабыллаах учууталлар, уһуйааччылар, педагогическай үлэ бэтэрээннэрэ, төрөппүттэр уонна биир дойдулаахтарым! Эһигини барыгытын саҥа үөрэх дьыла саҕаламмытынан, сырдык Билии күнүнэн «Нам улууһа» муниципальнай оройуон дьаһалтатын уонна тус бэйэм ааппыттан ис сүрэхтэн итиитик-истиҥник эҕэрдэлиибин! Балаҕан ыйын 1 күнэ — хас биирдиибитигэр, бары көлүөнэ дьоҥҥо, сүрэхпитигэр дириҥник иҥмит, сырдык оҕо сааспыт умнуллубат кэмнэрин, эрчимнээх эдэр сааспыт сылларын, эрэллээх доҕотторбутун уонна олох суолугар сирдээбит учууталларбытын долгуйа ахтар-саныыр биир саамай истиҥ итиэннэ күндү бэлиэ күммүт буолар. 2026–2027 үөрэх сылыгар улууспут үрдүнэн 25 оскуолаҕа барыта 4 162 үөрэнээччи саҥа үөрэх сылын саҕалыа. Олортон 300-чэ маҥнайгы кылаас үөрэнээччитигэр маҥнайгы чуораан чугдаарыаҕа, кинилэр аан бастаан учууталларын кытта долгуйа көрсүөхтэрэ. Оскуоланы бүтэрэн, олох киэҥ аартыгар үктэнэр 11-с кылаас 308 үөрэнээччитигэр олохторугар эппиэтинэстээх, долгутуулаах уонна ураты кэм тиийэн кэллэ. Кинилэр иннилэригэр иҥэриммит билиилэрин түмүктүүр итиэннэ кэлэр идэлэрин талар судаарыстыбаннай аттестация улахан тургутуулара күүтэллэр. Хас биирдии киһи олоххо ситиһиитэ, табыллыыта билии ылбыт, үөрэммит сириттэн – оскуолаттан саҕаланар. Үөрэхтээх, билиилээх киһи инникитэ ордук кэскиллээх, төрөөбүт сиригэр-уотугар, тус бэйэтигэр, дьонугар-сэргэтигэр туһата улахан. Биһиги оҕолорбут киэҥ билиини иҥэринэн, олох суолугар эрэллээхтик уонна дьоһуннаахтык үктэнэллэригэр төрөппүттэр, учууталлар өйөбүллэрэ, болҕомтолоро күүс-көмө, тирэх буолуоҕа. Быйыл Россияҕа — Сомоҕолоһуу, Саха Өрөспүүбүлүкэтигэр — Культура, онтон Нам улууһугар — уһулуччулаах государственнай уонна политическай деятель, киэн туттар биир дойдулаахпыт Илья Егорович Винокуров төрөөбүтэ 130 сылын уонна Дьиэ кэргэн экономикатын сайыннарыы сылын бэлиэтиибит. Сырдык уонна кэскиллээх өйдөөх-санаалаах, чэгиэн-чэбдик доруобуйалаах, төрөөбүт дойдутугар бэриниилээх патриот ыччаты иитэн таһаарыы — биһиги уопсай уонна сүрүн сыалбыт буолар. Убаастабыллаах учууталлар, иитээччилэр! Үүнэр көлүөнэни үрдүк билиилээх, сиэрдээх майгылаах уонна эт-хаан өттүнэн чэбдик доруобуйалаах гына иитэр улахан эппиэтинэс сүктэриллибит күндү дьоммутугар — саҥа үөрэх сылыгар үлэҕитигэр саҥа чыпчааллары, ситиһиини уонна бигэ туругу баҕарабын! Күндү үөрэнээччилэр, устудьуоннар, Нам улууһун, Саха сирин сарсыҥҥытын салайсар, эрэнэр кэскилбит! Үөрэҕи кынат оҥостуҥ, үүнүҥ, сайдыҥ, саҥаттан-саҥа билиигэ, үтүөҕэ дьулуһуҥ! Үөрэххэ, үлэҕэ үрдүк ситиһиилэри, саҥа чыпчаалларга тириэрдэр кыайыылары баҕарабын! Эҕэрдэни кытта "Нам улууһа" МО баһылыга Юрий Слепцов