Т.К. Ядрихинская аатынан Намнааҕы социальнай-геронтологическай киин култуура тэрээһинн...
Т.К. Ядрихинская аатынан Намнааҕы социальнай-геронтологическай киин култуура тэрээһиннэрин ыытааччы Мария Матвеева иһитиннэрбитинэн, билиҥҥи туругунан кииҥҥэ 65 кырдьаҕас олорор. Кинилэргэ анаан алтынньы 1 күнүгэр Аҕам саастаахтар декадалара "Отон олоҥхото" бырайыак чэрчитинэн сылын ахсын ыытыллар "Биир курууска отон" аһымал аахсыйаттан саҕаламмыт. Бу күн Олоҥхо дьиэтин үлэһиттэрэ нэһилиэнньэттэн хомуллубут отону туттарбыттар, ырыанан эҕэрдэлэрин тиэрдибиттэр. Олоҥхону аҕам саастаахтар дьиэлэрин иһинэн үлэлиир "Оллоон" фольклор бөлөх кыттыылаахтара Зоя Петрова уонна Анатолий Охотин толорбуттар. Элбэх республикатааҕы олоҥхо күрэҕин кыттыылааҕа Сайдар Айар Кыыдаана Н.В. Москвитин "Хаан Дьаргыстай" олоҥхотун иһитиннэрбит. Алтынньы 2 күнүгэр киин олохтооҕо, бастыҥ дуобаччыт, тыыл ветерана Феофанов Е.М. аатынан дуобат күрэҕэ тэриллибит. Нам сэлиэнньэтин «Ипподром» түөлбэтиттэн, инбэлииттэр обществоларыттан, «Эҥсиэли оһуохайа» улуустааҕы түмсүүттэн, Ыччат сүбэтиттэн, «Кырымахтар» общественнай түмсүүттэн уонна социальнай- геронтологическай киинтэн үстүү киһилээх хамаандалар күөн көрсүһүүлэрэ бэрт сэргэхтик ааспыт. Бу күн кырдьаҕастар СӨ култууратын үтүөлээх үлэһитэ, З.П. Винокуров аатынан Намнааҕы оҕо искусствотын оскуолатын учуутала Николай Николаевич Пестряков 75 сааһын туолар үбүлүөйүнэй «Байаан — олоҕум аргыһа» айар дьоро киэһэтигэр дуоһуйа ыалдьыттаабыттар. “Нам улууһа” МО пресс-сулууспата