Нь.С. Тимофеев аатынан Намнааҕы Олимпийскай эрэллэри бэлэмниир оҕо спордун оскуолатын и...
Нь.С. Тимофеев аатынан Намнааҕы Олимпийскай эрэллэри бэлэмниир оҕо спордун оскуолатын иитиллээччитэ Будимир Мыреев Дойдубут тэбэр сүрэҕэр, Москва куоракка, спорт үрдүкү чыпчаалларын дабайар кыахтанна! Бу күннэргэ намнар Саха сирин эр дьонун волейболга сүүмэрдэммит хамаандатын старшай тренерэ Айсен Жерготов ситиһиилээх иитиллээччитэ Россиятааҕы технологическай университет студеннарын «Альянс» спорт кулуубун кытта хантараакка илии баттаспытын истэн олус үөрдүбүт, киэн тутуннубут. Москва күүстээх хамаандатын кытта хантараак баттааһын Саха сирин, Нь.С. Тимофеев аатынан Намнааҕы Олимпийскай эрэллэри бэлэмниир оҕо спордун оскуолатын волейболистарын үчүгэй бэлэмнэрин уонна идэлээх тренердэр үрдүк таһымнарын көрдөрөр. Будимир Мыреев ситиһиилэрэ Будимир Айсен Жерготов салалтатынан волейболунан дьаныардаахтык дьарыктаммыта. 2008-2009 сыл төрүөх уолаттарга Саха сирин сүүмэрдэммит хамаандатын хапытааныгар тиийэ үүммүтэ. Өрөспүүбүлүкэ волейболга сүүмэрдэммит хамаандатын састаабыгар Будимир хаста да Саха сирин чемпионын үрдүк аатын сүкпүтэ, Уһук Илин федеральнай уокурукка бастыыр иһин бириистээх миэстэлэри ылбыта. Будимир Мыреев хапытааннаах хамаанда - Башкортостан Өрөспүүбүлүкэтин Уфа куоратыгар ыытыллыбыт норуоттар икки ардыларынааҕы турнир кыайыылааҕа. 2024 сылга «Азия оҕолоро» VIII норуоттар икки ардыларынааҕы спорт оонньууларыгар өрөспүүбүлүкэ чиэһин көмүскээбитэ. Бастакы разрядтаах спортсмен. Будимир спорду кытта үөрэҕи дьүөрэлии тутан Өрөспүүбүлүкэтээҕи лиссиэй-интэринээти кыһыл көмүс мэтээлинэн бүтэрбитэ. Будимиры, кини тренерэ Айсен Жерготовы, Василий Винокуров дириэктэрдээх Нь.С. Тимофеев аатынан Намнааҕы Олимпийскай эрэллэри бэлэмниир оҕо спордун оскуолатын Россияҕа спорт солбугун бэлэмнээһиҥҥэ сыралаах үлэҕит үтүө түмүктэммитинэн эҕэрдэлиибит уонна бу түгэн өрөспүүбүлүкэҕэ, улууспутугар волейбол сайдыытыгар саҥа саҕахтары арыйыа диэн эрэнэбит. “Нам улууһа” МО пресс-сулууспата