УЛУУС БАҺЫЛЫГЫН ПЛАНЕРКАТЫТТАН СОНУННАР
УЛУУС БАҺЫЛЫГЫН ПЛАНЕРКАТЫТТАН СОНУННАР Бүгүн, алтынньы 26 күнүгэр, сарсыарда 9:00 чаастан уонна күн иккис аҥарыгар 14:00 чаастан улуус баһылыга Юрий Слепцов нэһилиэк баһылыктарын, улуус тэрилтэлэрин, дьаһалта отделларын уонна управлениеларын салайааччыларын кыттыылаах планерка мунньахтарын салайан ыытта. Тэрээһин кэмигэр ааспыт нэдиэлэҕэ ыытыллыбыт үлэлэр түмүктэрэ көрүлүннүлэр уонна инники былааннар, соруктар туруорулуннулар. Мунньах саҕаланыан иннинэ, Нам улууһугар үөрэҕирии ситимэ тэриллибитэ 155 сыллаах үбүлүөйүнэн, улуус баһылыга Юрий Слепцов уонна култуура уонна духуобунай сайдыы управлениетын начальнига Семен Ядрихинскай үөрэх управлениетын салайааччытыгар Мария Игнатьеваҕа Махтал суруктары үөрүүлээх быһыыга - майгыга туттардылар. ✅Роспотребнадзор Намнааҕы салаатын отделын салайааччыта Марфа Игнатьева иһитиннэрбитинэн, бүгүҥҥү күҥҥэ улууска грипп уонна ОРВИ сыстыганнаах ыарыыларын тарҕаныыта эпидемиологическай боруогуттан намыһах таһымҥа турар. ✅Балаҕан ыйын 1 күнүттэн предпринимателлэргэ «Честный знак» систематынан автоматическай штрафтар (автоштрафтар) киирбиттэрин билиһиннэрдэ. (Бу туһунан информация сиһилии эрдэ Нам улууһун дьаһалтатын социальнай ситимнэригэр тахсыбыта). ✅Саҥа уларыйыы киириитинэн, инспекция бэрэбиэркэтин кэтэспэккэ, система бэйэтэ кэһиилэри фиксируйдуур уонна ыстараап түһэрэр. Ол курдук, болдьоҕо ааспыт (просрочка) табаары система бобуутун үрдүнэн атыылаатахха, хас биирдии табаар иһин ИП-ларга — 10 000 солкуобай, юридическай сирэйдэргэ (ООО) — 20 000 солкуобай ыстараап олохтонорун кэпсээтэ. Бу ирдэбил сүрүннээн үрүҥ аска, эмтэргэ, БАД-тарга курдук болдьохтоох табаардарга сыһыаннаах.⤵️