Ытыктабыллаах урукку комсомолецтары үүммүт Комсомол күнүнэн итиитик-истиҥник эҕэрдэлиибин!
Ытыктабыллаах урукку комсомолецтары үүммүт Комсомол күнүнэн итиитик-истиҥник эҕэрдэлиибин! Алтынньы 29 күнэ — Ленинскэй Комсомол төрүттэммит күнэ! Комсомол ыччаты иитиигэ, үөрэтиигэ олоххо бэлэмнээһиҥҥэ киллэрбит сүдү кылаата туохха да тэҥнэммэт. Ыччаты биир сыалга-сорукка түмэн, үлэни-хамнаһы кыайар эдэр эрчими дойду сайдыытыгар туһулаабыт комсомол тэрилтэтэ бэйэтин кэмигэр, чахчы даҕаны, олус улахан суолталааҕа. БАМ тутуута, «Оскуола- производство-үрдүк үөрэх», «Бэйэҥ сулускун умат» ыҥырыылары өйөөн комсомоллар уонна ыччаттар олох араас хайысхаларыгар үлэни көҕүлүүллэрэ. Комсомолецтар үгүс общественнай үлэни - хотоннору өрөмүөннээһини, тэрилтэлэргэ мас, муус бэлэмнээһинин, кэнсиэртэргэ, оттооһуҥҥа кыттыы, сүөһүнү көһөрүү, бөһүөлэги ыраастааһыны - ыыталлара. Комсомол иҥэрбит үйэлээх сыаннастарын – төрөөбүт дойдуга тапталы, ытык иэһи, үлэһит буолууну, киһилии истиҥ сыһыаны, бэриниилээх буолууну бэйэлэрин дууһаларыгар, өйдөрүгэр-санааларыгар илдьэ сылдьар Комсомол ииппит дьоно күн да бүгүн ыччат дьоҥҥо бэйэҕит олоххутунан өрүү бастыҥ холобур буола сылдьаҕыт. Ыарахантан чаҕыйбакка, үлэттэн куоппакка олох хардыытынан дойдугут сайдарыгар күүскүтүн уурбуккут, санааҕытын холбообуккут сыаналанан үлэһит үтүөлэрэ буолан дьон махталын ыллаххыт. Эһиэхэ эдэр көлүөнэҕэ өйөбүлгүт, сүбэҕит-амаҕыт иһин истиҥник махтанан туран, хас биирдиигитигэр чэгиэн туругу, уһун дьоллоох олоҕу, бары үтүөнү баҕарабын! Төлөннөөх сүрэххит кырдьары билиммэккэ, өрүүтүн сырдыгынан сыдьаайа, үлэни көҕүлүү, сайдыыга ыҥыра сырыттын! Ытыктабылы кытта, «Нам улууһа» муниципальнай оройуон баһылыга Юрий Иннокентьевич Слепцов