УЛУУС БАҺЫЛЫГЫН ПЛАНЕРКАТЫТТАН СОНУННАР
УЛУУС БАҺЫЛЫГЫН ПЛАНЕРКАТЫТТАН СОНУННАР Бүгүн, сэтинньи 2 күнүгэр, сарсыарда 9:00 чаастан уонна күн иккис аҥарыгар 14:00 чаастан улуус баһылыга Юрий Слепцов нэһилиэк баһылыктарын, улуус тэрилтэлэрин, дьаһалта отделларын уонна управлениеларын салайааччыларын кыттыылаах планерка мунньахтарын салайан ыытта. Тэрээһин кэмигэр ааспыт нэдиэлэҕэ ыытыллыбыт үлэлэр түмүктэрэ көрүлүннүлэр, инники былааннар уонна соруктар туруорулуннулар. Мунньах саҕаланыытыгар Юрий Иннокентьевич, экономика уонна үп боппуруостарыгар улуус баһылыгын солбуйааччыта Екатерина Прокопьевна Саввинова муниципальнай пенсияҕа (бочуоттаах сынньалаҥҥа) барбытынан, бу дуоһунаска эбээһинэһи толорооччунан экономика управлениетын начальнигынан үлэлээбит Олег Николаев анаммытын билиһиннэрдэ. Экономика управлениетын саҥа салайааччытынан (начальнигын эбээһинэһин толорооччунан), бу иннинэ начальнигы солбуйааччынан үлэлээбит Анна Иннокентьевна Егорова ананна. ✅Намнааҕы 23-с №-дээх ОГПС начальнига Иван Винокуров ааспыт нэдиэлэҕэ 100 ыалга сылдьан баһаары утары өйдөтөр үлэ ыытыллыбытын иһитиннэрдэ. Сыл 10 ыйын түмүгүнэн улуус үрдүнэн буруо уонна уот тахсыбытын биллэрэр автономнай тэриллэри (АДПИ) туруоруу чааһынай ыалга — 72,0%-ҥа, онтон элбэх квартиралаах дьиэлэргэ (МКД) — 57,0%-ҥа тэҥнэспит. Бу көрдөрүү Аппааны, Хамаҕатта уонна Ленскэй нэһилиэктэригэр намыһах диэтэ. Иван Винокуров сыл бүтүөр диэри АДПИ-ны 100% туруорууга үлэ бара турарын бэлиэтээтэ. ✅Үөрэх управлениетын начальнига Мария Игнатьева бу нэдиэлэҕэ Саҥа технологиялар институтун преподавателлэрэ кэлэн үөрэх ыыталларын туһунан иһитиннэрдэ. Алтынньы 29 күнүгэр Үөрэх уонна наука министерствотын иитэр үлэҕэ өрөспүүбүлүкэтээҕи штабын 15 киһилээх бөлөҕө улуус үөрэх тэрилтэлэригэр методическай көмөнү оҥорбутун бэлиэтээтэ. Ону кытта улуус оскуолаларыгар күһүҥҥү каникул буола турарын уонна иккис чиэппэр үөрэҕэ сэтинньи 5 күнүттэн саҕаланарын эттэ. ✅Улуус баһылыга Юрий Слепцов улууска инженернай-техническэй хайысхалаах кылаас арылларыгар үлэ барарын сырдатта. Сөбүлэҥ быһыытынан, үөрэх процеһыгар М.К. Аммосов аатынан Хотугулуу-Илиҥҥи федеральнай университет преподавателлэрэ кыттыахтара. ✅Ону таһынан, улуус оскуолаларын сыллааҕы үлэлэрин түмүгүн быһаарар официальнай рейтинг сыл бүтүүтэ тахсар буолуо диэн иһитиннэрдэ. ✅Мунньахха бэйдиэ сылдьар ыттары бэрээдэктээһин боппуруоһа турда. Бу кыһалҕаны (проблеманы) быһаарарга улуус баһылыга хаһаайыннаах уонна хаһаайына суох бэйдиэ сылдьар ыттары утары үлэни күүһүрдэргэ, чуолкай быһаарыылары ылынарга соруктары туруорда. ✅Таастаах, Салбаҥ уонна Искра нэһилиэктэрин социальнай-экономическай сайдыыларыгар туһуламмыт форум сэтинньи 20 күнүгэр ыытыллара былааннанар. ✅Тыа хаһаайыстыбатын боппуруостарыгар, ол иһигэр туттарыллыбыт үүт төлөбүрүн төлөөһүн уонна анал программанан тутуллубут дьоҕус кыамталаах тыа хаһаайыстыбатын объектарын үлэҕэ киллэрии дьаһалларын быһаарыстылар. ✅Улуус баһылыга Юрий Слепцов оҥоһуллан тахсыбыт тыа хаһаайыстыбатын продукциятын батарыыга саҥа механизмнары толкуйдуурга, торумнуурга сорук туруорда. ✅Кэлэр 2027 сылга хас биирдии нэһилиэк бэйэтин приоритетнай хайысхаларын чуолкайдаан, былааннаах үлэни тэрийэригэр улуус баһылыга дьаһал биэрдэ. ✅Ону таһынан, уһулуччулаах государственнай уонна политическай деятель М.К. Аммосов төрөөбүтэ 130 сыллаах юбилейын бэлиэтээһин чэрчитинэн, нэһилиэктэр хамаандалара бэйэлэрин кэскиллээх проектарын суруйан көмүскүүр уопсай тэрээһиннэрэ былааннанар. Бу тэрээһин сүрүн соругунан хас биирдии нэһилиэк бэйэтин проектын олоххо киллэрэрин ситиһии буолар. ✅Ленскэй острог тутуллубута 395 уонна 400 сыллаах юбилейдарын көрсө былааннаммыт үлэлэр чэрчилэринэн, Гуманитарнай чинчийии институтун (ИГИ) кытта сөбүлэҥ быһыытынан, Иккис Хомустаах нэһилиэгин сиригэр-уотугар археологическай чинчийиилэр ыытыллыахтара. ⤵️