Николай Петрович олоҕун суола тыа сирин кытта ыкса сибээстээх. Кини 1961 сыллаахха Моду...
Николай Петрович олоҕун суола тыа сирин кытта ыкса сибээстээх. Кини 1961 сыллаахха Модут нэһилиэгэр төрөөбүтэ, Нам орто оскуолатын бүтэрэн М.К. Аммосов аатынан совхозка кадровай булчутунан, сылгыһытынан үлэлээбитэ. Саха государственнай университетын тыа хаһаайыстыбатын факультетын инженер-зоотехник идэтин ылан бочуоттаах сынньалаҥҥа тахсыар диэри эҥкилэ суох үлэлээбитэ. Саҥа тахсыбыт хомуурунньук быйыл, 2026 сыллаахха, «Дани-Алмас» кинигэ кыһатыгар 100 ахсаанынан бэчээттэнэн күн сирин көрдө. Кинигэ киирии тылын СӨ Суруйааччыларын сойууһун чилиэнэ, бэйиэт Мария Решетникова-Арылы Дуйдаах олус истиҥник суруйбут. Хомуурунньук хоһооннор суруллубут сыллара бэлиэтэммитинэн уонна ааптар бэйэтэ түһэрбит хаартыскалара киллэриллибиттэринэн уратылаах. Ыытааччы ааптары кытта кэпсэтиитигэр кини хаһааҥҥыттан суруйар буолбутун, иэйиитэ хайдах кэлэрин, «Тэккэ Ньукулай» диэн өбүгэлэриттэн силис тардан ылыммыт айар аатын уонна Сииттэ туһунан хоһооннорун кистэлэҥин сэгэттэ. Дьоро киэһэҕэ истиҥ эҕэрдэ тылларын «Нам улууһа» МО баһылыгын солбуйааччы Егор Протопопов, «Модут нэһилиэгэ» ТСТ баһылыга Ефим Гоголев уонна Нам улууһун култуураҕа уонна духуобунай сайдыыга управлениетын начальнига Семен Ядрихинскай тиэртилэр. Ааптар төрөөбүт сирин - Модутун мааны түөлбэтин айар куттаах дьонун түмэр «Санаа оһуора» литературнай түмсүү кыттыылаахтара, салайааччылара Екатерина Лукинова-Сэргээнэ Тэккэ Ньукулайы олус истиҥник, иһирэхтик эҕэрдэлээтилэр уонна ааптар хоһооннорун дорҕоонноохтук аахтылар. Түмсүү биир тутаах чилиэнэ Розалия Никитична - Дьолуо француз тылынан Модукка анаабыт хоһоонун ааҕан дьон биһирэбилин ылла. Улуустааҕы «Отуу уота» литературнай түмсүү кыттыылаахтара уонна салайааччылара СӨ Суруйааччыларын сойууһун чилиэнэ Алексей Татаринов-Удьурҕай доҕордорун маҥнайгы кинигэтэ күн сирин көрбүтүгэр дууһалыын үөрэн, олус өрө көтөҕүллэн туран истиҥ тылларын тиэрдэн эҕэрдэлээтилэр. Саҥа хоһооннорун бэрт ылбаҕайдык аахтылар, айар киэһэни ырыа кэрэтинэн киэргэтэн кэлбит ыалдьыттары дууһалыын сылыттылар. Алексей Татаринов «Отуу уоттарыгар» өссө биир мааны, сыаналаах кинигэ эбиллибитинэн ис сүрэҕиттэн үөрэн туран алгыстаах тылын тиэртэ. Ааспыт оҕо саас умнуллубат сылаас кэмнэрин санатан Николай Петрович оскуолаҕа бииргэ үөрэммит доҕотторо сүрэхтэн тахсар истиҥ тылларынан эҕэрдэлээтилэр. Модуттааҕы И.С. Охлопков аатынан сынньалаҥ киинин дириэктэрэ Саргылаана Ядрихинская-Попова уонна олохтоох модельнай библиотека үлэһитэ Сардана Сивцева ааптарга мааны алгыстарын тиэртилэр, инникитин да бииргэ үлэлииргэ бэлэмнэрин биллэрдилэр. Николай Петрович дьиэ кэргэн эрэллээх хаһаайына, тапталлаах аҕата буолар. Кини олоҕун аргыһа Таисия Ивановнаны кытта илии-илииттэн сиэттиһэн биэс оҕону кэскиллээх дьон гына улаатыннаран, алта сиэни тапталга биһиктээн дьоллоох ыал буолан олороллор. Бу үөрүүлээх күн Таисия Ивановна ис сүрэхтэн тахсар долгутуулаах эҕэрдэ тылыгар хомуурунньук күн сирин көрбүт кистэлэҥин арыйда. Кини кэпсээбитинэн, Николай Петрович айбыт хоһооннорун тапталлаах оҕолоро аҕаларын ааспыт өрөгөйдөөх үбүлүөйүгэр анаан, киниэхэ бэйэтигэр биллэрбэккэ олус күндү, соһуччу бэлэх оҥорон бэчээттэтэн таһаарбыттар эбит. Тэрээһиҥҥэ ааптар бииргэ төрөөбүт балта Елена Никитина уонна чугас аймахтара кэлэннэр, Николай Петрович үөрүүтүн истиҥник үллэһиннилэр. Дьоро күн Арылы Дуйдаах «Уҕараабат айар уоту, уһун дьоллоох олоҕу, талба талаанын кустук араас өҥүнэн таһымнаан иһэригэр алгыаҕыҥ» диэн сырдык алгыс тылларынан уонна өйдөбүнньүк хаартыскаҕа түһүүнэн түмүктэннэ. Николай Петровичка өссө да үрдүк айар чыпчааллары, ситиһиилэри баҕарабыт! Сардана Сивцева, Модуттааҕы тыа сирин модельнай библиотекатын сэбиэдиссэйэ