12 сентябрҙә Башҡортостан Башлығы Радий Хәбиров “Патриот” паркында “Геройҙар биләмәһе” ...
12 сентябрҙә Башҡортостан Башлығы Радий Хәбиров “Патриот” паркында “Геройҙар биләмәһе” патриотик йыйынында ҡатнашыусы һаулығы сикләнгән балалар менән осрашты. Йыйынға бөтә республиканан 6–14 йәшлек 132 малай килгән. Ата-әсәләре лә улар менән бергә. Ирекмәндәр ярҙамлашып йөрөй. “Патриот” паркында малайҙар ысын егеттәрсә ҡорал тоторға, пилотһыҙ осҡостарға идара итергә, тактик медицина алымдарына өйрәнгән. “Һәр ир-ат төрлө бурыстарҙы үтәргә тейеш. Беҙ, өлкәндәр, һеҙҙе бик ихтирам итәбеҙ һәм һеҙҙе геройҙар итеп күрәбеҙ. Ҡыҙғанысҡа ҡаршы, һеҙ бер аҙ сырхау – шулай килеп сыҡҡан инде, ләкин һеҙҙә йәшәү һәм ир кеше булыу теләге көслө. Беҙ быны күрәбеҙ һәм шуға йыл да һеҙҙе ошонда, “Патриот” паркында, йыябыҙ. Ата-әсәләргә өндәшәм: һеҙҙең яҙмышҡа төшкән өлөш ябай түгел, беҙ быны аңлайбыҙ. Һеҙгә көс, рух ныҡлығы һәм, әлбиттә, өмөт теләйем. Балаларҙы дауалауҙа ярҙам итеү, тормошоғоҙҙо еңеләйтеү өсөн республика һеҙгә бөтәһен дә эшләр”, – тине Радий Хәбиров. Аталары махсус хәрби операцияла хеҙмәттә булған балаларға республика Башлығы уларға хөрмәт һәм рәхмәт һүҙҙәре еткеререүен теләне. “Беләм, бында аталары һәләк булған балалар ҙа бар. Атайҙарығыҙ – герой, улар һәр саҡ беҙҙең менән, беҙҙең йөрәктәрҙә йәшәр. Һеҙ улар менән ғорурланырға тейешһегеҙ, ә республика һеҙгә үҫергә һәм уҡып сығырға ярҙамлашыр”, – тине Башҡортостан етәксеһе, МХО яугирҙарының балаларына мөрәжәғәт итеп. Сараны “Бәхет биләмәһе” хәйриә фонды БР Мәғариф министрлығы һәм БР Ғаилә, хеҙмәт һәм халыҡты социаль яҡлау министрлығы менән бергә ойошторған. Фото: Азат Мөхәмәтйәнов / БР Башлығының матбуғат хеҙмәте / Башинформ.