Арча районы үзәк хастаханәсенең 1 номерлы дәвалау корпусына капиталь ремонт ясалачак
Арча районы үзәк хастаханәсенең 1 номерлы дәвалау корпусына капиталь ремонт ясалачак Капиталь ремонт ясау турында карар районның сәламәтлек саклау системасын яңарту буенча зур программаның беренче һәм мөһим этабы булачак. Бу турыда район башлыгының матбугат хезмәте хәбәр итә. Эшләрне этаплап башкару планлаштырыла. Бу халыкка медицина ярдәме күрсәтүне туктатмаска һәм хастаханәнең төп бүлекчәләре эшчәнлеген саклап калырга мөмкинлек бирәчәк. Ремонт графигы пациентлар өчен медицина хезмәтләренең һәрвакытта да мөмкин булуын исәпкә алып төзеләчәк. Медицина учреждениеләрен ремонтлау һәм модернизацияләү Россиядә «Сәламәтлек саклауның беренчел звеносын модернизацияләү» федераль проекты кысаларында башкарыла. Әлеге проект «Озак һәм актив тормыш» илкүләм проекты составына керә.