Бүген Балтач муниципаль районы башлыгы Рамил Рәшит улы Нотфуллинның гомер бәйрәме– 65 я... — 28 июля 2026 г. в 07:18:30.496
Бүген Балтач муниципаль районы башлыгы Рамил Рәшит улы Нотфуллинның гомер бәйрәме– 65 яшьлек күркәм юбилее – тормыш юлын барлап, ирешкән уңышларга сөенеп, киләчәккә якты өметләр баглый торган мөһим көн! Тумышы белән Балтач районының Салавыч Сәрдегәне авылыннан булган хөрмәтле җитәкчебезнең авыл җирендә үскән булуы, аның йөрәгендә туган туфракка, авыл кешеләренә карата тирән мәхәббәт һәм ихтирам тәрбияләгән. Авыл хуҗалыгы өлкәсендә дистәләгән еллар дәвамында куйган фидакарь хезмәте, үз эшенә бирелгәнлеге нәтиҗәсендә, Рамил Рәшит улы республикада танылган җитәкче дәрәҗәсенә күтәрелде. 2012 елдан башлап, Татарстан Республикасының Балтач муниципаль районы башлыгы булып эшләү дәверендә, районның социаль-икътисадый үсешенә гаять зур өлеш кертте. «Ак як» дип дан алган Балтач районы ихтирамлы җитәкче кулы астында авыл хуҗалыгы күрсәткечләре буенча республикада алдынгылар рәтенә, сөт җитештерү күләме буенча өчлек лидеры сафына күтәрелде, шәхси хуҗалыкларда терлек асрау традицияләрен саклап калуда башкаларга үрнәк булып торырлык дәрәҗәдә үсте, ныгыды. Әлеге уңышлар артында, әлбәттә, Рамил Рәшит улының оста оештыру сәләте, халык язмышына битараф булмавы һәм һәрвакыт яңалыкка омтылуы тора. Хөрмәтле Рамил Рәшитович! Булсын дип, куйган максатларына ирешеп яшәүче ирләрдә ил таянырлык көчләр була. Моның шулай икәнлеге хәзерге вакытларда бигрәк тә ачык күренә. Сез – районыбызның тотрыклы, камил тормышы өчен бар көчегезне бирүче шәхес. Яңалыклар белән янәшә атлыйсыз, максат-бурычларны тормышка ашыру өчен, нинди генә эшкә алынсагыз да, аны зур төгәллек, нәтиҗәле итеп башкарып чыгасыз. Балтачыбыз елдан-ел үзгә матурлыкка төренә. Авылларыбыз төзекләнә, тормыш шартлары яхшыра. Һәр кылган гамәлегез район файдасына, район халкының рәхәт яшәешенә багышланган. Сез милли гореф-гадәтләребезне, телебезне саклау юнәлешенә дә аеруча зур игътибар бирәсез. Районыбызда төрле милләт вәкилләренең дус-тату яшәве, татар теленең генә түгел, ә районыбыз халкы аралашкан барлык телләрнең дә абруе хакында кайгырту, яшь буынга дөрес тәрбия бирү — болар барысы да Сезнең эшчәнлегегезнең аерылгысыз өлеше. Сау-сәламәт булып, алга таба да кешеләргә бәрәкәт өләшүче игелекле хезмәтегезне дәвам итәргә язсын. Хезмәтегездә таләпчән җитәкче булсагыз да, тормышта Сез гадел, ярдәмчел һәм кече күңелле шәхес. Сезне күркәм юбилеегыз – 65 яшь тулган көнегез белән котлап, ихлас теләкләребезне җиткерәбез. Балтач җире Сезнең кебек тырыш, намуслы һәм милләт җанлы уллары белән бәхетле. Тормыш иптәшегез Фәния ханым белән тигезлектә, аңлашып, бер-берегезгә терәк булып, якыннарыгызның игелеген күреп, балаларыгызның һәм оныкларыгызның уңышларына сөенеп яшәргә насыйп булсын! Алга таба да районыбызның тоткасы булып, сау-сәламәт булып калыгыз! Олы ихтирам белән: Балтач районы Советы һәм район башкарма комитеты коллективлары.