Авыл хуҗалыгы тармагы — икмәк кадерен, җир сулышын һәм терлек тәрбиясенең киеренке хезм...
Авыл хуҗалыгы тармагы — икмәк кадерен, җир сулышын һәм терлек тәрбиясенең киеренке хезмәтен үз иңнәрендә йөртүчеләрнең фидакарь хезмәтеннән ярала. Һәр ел фасылының үз мәшәкате, үз шатлыгы булса да, авыл хуҗалыгы тармагында җәй-көз айлары аеруча җаваплы чор. Уңышны җыеп алгач җир эшкәртү, кышкы чорга җитәрлек азык запасы туплап калдыру — бүгенге көннең дә төп бурычы. «Сосна» авыл хуҗалыгы җәмгыятендә эшнең кызган чагы. Көзге көннең һәр минуты, механизаторлар һәм шоферларның һәр хәрәкәте кадерле, басуда кукуруздан силос салу эше гөрли. Мөһим кампаниядә дистә еллар буена үз эшенә тугры калган, хуҗалыкның тоткасы булган тәҗрибәле эшчеләр хезмәт куя. Шофёр Радик Таҗетдинов кыр юлларын инде 32 ел таптый. Аның янәшәсендә — Илшат Муллагалиев, аның да руль артындагы хезмәт стажы 30 елга якын. Шулай ук җәмгыятьнең алдынгы шофер егетләренең берсе – Ингел Закировның авыл хуҗалыгы өлкәсендә хезмәт тәҗрибәсе 15 елдан артык, ул да үзенең төгәллеге һәм тырышлыгы белән аерылып тора. Ә фидакарь механизатор Искәндәр Муллагалиевны кырларның аксакалы дип атарга мөмкин — аның хезмәт стажы 40 елдан артып киткән! Әлеге хезмәтчәннәребез буыннар буена килгән һөнәрнең һәм җиргә булган тугрылыкның тере гәүдәләнешләре! Фидакарьләребезнең һәрберсе — үз эшенең остасы. Алар техникага җан өрәләр, сезон буена ашлык җыюда да, терлек азыгы хәзерләүдә дә катнашалар. Сосна авыл хуҗалыгы җәмгыятендә бүгенге көнгә 484 гектар мәйданнан 15 447 тонна кукуруз силосы хәзерләнгән. Һәр тоннада игенчелек хезмәтчәннәренең кул җылысы, йокысыз төннәре, фидакарь хезмәте. Авыл хуҗалыгы хезмәтчәннәре көне якынлашкан көннәрдә «Сосна» хуҗалыгының кыр хезмәтчәннәренә, һәм, гомумән, җирдә икмәк үстерүче, терлек асраучы һәркемгә хөрмәтебез чиксез! Сезнең фидакарь хезмәтегез, җиргә булган мәхәббәтегез алдында баш иярлек. Авыл хуҗалыгы хезмәтчәннәренә хәерле эш көннәре, исәнлек-саулык, гаилә бәхете һәм хезмәтләренең хөрмәтле булуын теләп калабыз!