Ветераннарны кайгыртып яшәү – ил, республика һәм һәр муниципаль берәмлек җитәкчелеге а...
Ветераннарны кайгыртып яшәү – ил, республика һәм һәр муниципаль берәмлек җитәкчелеге алдына куелган иң мөһим бурычларның берсе. Окябрьнең алтынга манылган көннәренә уралып гомерләр уза тора. Адәм баласының исәнлектә каршы алган һәр яшәеш көне – Аллаһ бүләге! Районыбызның Карадуган авылында гомер кичерүче Гөлфирә Гафур кызы Хәсәншина да үз гомер агышларында ничәмә-ничә язларны, шулкадәр үк кышларны, җәйләрне каршылаган. Ә октябрь аның күңеленә аеруча якын, чөнки әлеге фасыл аңа ел саен яшәеш чаткысы бүләк итә, гомер юлының һәр узган елын тормыш тәҗрибәсе итеп күңел дәфтәренә терки бара. 9 октябрьда районыбызның хөрмәтле акъәбисе үзенең 90 яшьлек олуг гомер бәйрәмен дә шөкрана кылып, хәерле исәнлектә каршы алды. Шул уңайдан, ихтирамлы юбилярга район башлыгының Рәхмәт хаты һәм истәлекле бүләкләр тапшырылды. Гөлфирә Гафур кызы бүгенге көндә, якыннары янәшәсендә, һәрдаим аларның кадер-хөрмәтен тоеп бәхетле гомер кичерә. Гомер буе үз хәләл көченә ышанып, намус белән эшләп, хезмәтне сөеп яшәгән, якыннары-туганнарының кадер-хөрмәтен тоеп тыныч картлык кичерүче өлкәнебезгә киләчәктә дә хәерле, күркәм тәрбияле картлык, имин тормышлар насыйп булсын!