Хөрмәтле авыл хуҗалыгы хезмәтчәннәре, әлеге тармакта эшләп лаеклы ялга чыккан ветеранна...
Хөрмәтле авыл хуҗалыгы хезмәтчәннәре, әлеге тармакта эшләп лаеклы ялга чыккан ветераннар!Сезне авыл хуҗалыгы һәм эшкәртү сәнәгате хезмәткәрләре көне белән ихластан котлыйм. Балтач районында яшәүче халык элек-электән ата-бабаларыбыз рухын, көч-куәтен лаеклы рәвештә буыннардан-буыннарга илтүче хезмәт алдынгылары булулары белән данлыклы. Бүгенге яшәешебездә дә буыннар алмашы буенча күчеп баручы үз туган туфрагыңа чиксез хөрмәт-ярату, тәрбия хисләре көч-дәрәҗәсен югалтмый. Агымдагы хезмәт елында да авыл хуҗалыгы хезмәтчәннәре сынатмадылар, яхшыга өмет тотып, үз эшләрен һәрвакыттагыча намус белән башкардылар. Игенче- механизаторларның, шофер егетләрнең олы хезмәте - район күмәк хуҗалыклары амбар алларын тулыландырган 100 мең 211 тонна ашлык муллыгында, мул сөт җитештерүнең төп алшарты булып торучы сыйфатлы терлек азыгы – 262 мең 926 тоннадан артык сенаж, 22 мең 466 тонна печән, 249 мең тоннага якын силоста ачык чагылыш ала. Бөртеккә суктырылган кукуруз культурасы бүгенге көндә 14 мең 800 тонна. Районыбызда кукуруз культурасын суктыру әле бүгенге көндә дә эзлекле рәвештә дәвам итә. Икътисадның төп нигез ташларының берсе булган терлекчелек тармагында да күрсәткечләр үсештә. Агымдагы елның 9 аенда терлекче-савымчыларның фидакарь хезмәте белән районда тулаем 6 мең 385 тонна ит һәм 118 мең 030 тонна сөт җитештерелде. Райондашларыбызның фидакарьлеге, тырышлыгы һәр җирдә чагылыш таба, күренекле хезмәт нәтиҗәләре район-республикабызның тотрыклы үсешенә дә йогынты ясый. Әлеге тармакта эшләгән фидакарь хезмәтчәннәрнең һәрберсе үз урыннарында алыштыргысыз һәм иң ихтирамлы кешеләр. Бүгенге күркәм бәйрәмгә катнашы булган һәр райондашыбызга саулык-сәламәтлек, гаиләләренә иминлек, бәхет, тыныч тормыш, күренекле хезмәт җиңүләре телим!