Журналыбыҙҙың күптәнге дуҫы, "Юлдаш" радиоһы хеҙмәткәре, яугир әсәһе Әнисә Муллағолова ... — 15 сентября 2026 г. в 11:21:48.478
Журналыбыҙҙың күптәнге дуҫы, "Юлдаш" радиоһы хеҙмәткәре, яугир әсәһе Әнисә Муллағолова үткән ялдарҙа ҡаҙы эшләгән, беҙгә лә өйрәтте: - Йылҡының ҡабырғалы ҡаҙы итен алам. Ул тик иттән генә торорға тейеш түгел, майлыраҡ булырға тейеш. Беҙҙең атай-олатайҙар майлыраҡ булғанын яратҡан, сөнки унда холестерин юҡ. Майҙы ла бик ҡарап алам мин: елек кеүек кенә булғанын һайлайым. Күп йылдар эшләгәс, ниндәй май яҡшыраҡ икәнен бер ҡарауҙан аңлайым. Әҙерләнгән майлы итте ике өлөшкә бүлеп, тоҙ, ҡара борос һибәм. Икенсеһенә тоҙ, ҡара борос һәм үткәрелгән һарымһаҡ һалам. Ни өсөн тигәндә, ҡайһы бер кеше һарымһаҡлы ҡаҙы яратмай. Тәмләткестәр иткә бер аҙ һеңергә тейеш. Шул арала эсәктәр әҙерләйем, уларҙы бер оҙонлоҡта киҫәм. Аҙаҡ ҡаҙы итен эсәктәргә тултырам. Ике яҡ ситен, әсәйем өйрәткәнсә, аҡлыҡ теләп, аҡ еп менән бәйләйем, - ти тәжрибәле хужабикә. - Беҙҙең яҡта майлы ҡаҙыны бауыр өҫтөнә һалып ҡабалар. Атайым ветврач булғас, белә ине. Бауыр организм өсөн файҙалы. Уның үҙен генә ашағансы, майлы ҡаҙы менән ашау яҡшыраҡ. Әҙерләгән ҡаҙыларығыҙ ризыҡҡа яҙһын, тәмле булһын, хөрмәтле Әнисә Муса ҡыҙы