Юл буйлап ултыртылған ҡайындар араһынан бер ҡыҙ йүгерә. Көҙгө ямғыр уның былай ҙа кәмһе...
Юл буйлап ултыртылған ҡайындар араһынан бер ҡыҙ йүгерә. Көҙгө ямғыр уның былай ҙа кәмһетелгән күңелен өшөтә, ҡапыл ғына ингән ҡараңғылыҡ өркәк йөрәгенә ҡурҡыу өҫтәй. Өҫтөндәге кейеме йәйгесә, еңел генә кофта менән салбар кейгән. Кейемдәре һыуланып уның арыҡ кәүҙәһенә һылашҡан, ә башы яланбаш, сәстәрен резинка менән йыйып ҡуйған, аяғында тапалып бөткән галошы һыуға сыланған. Өҙлөкһөҙ яуған ямғыр тамсылары уның бите буйлап аҡҡан ҡайнар күҙ йәштәрен йыуып тора. Тик Марина ямғырҙы ла, һыуыҡты ла һиҙмәй, уның башында бер уй, тиҙерәк был ерҙәрҙән йырағыраҡ китергә. Ул ҡасып бара. Үҙ әсәһенән ҡәйнәһенә, үҙенең ире янына: - Ҡәҙир ҙә моғайын әсәһе янындалыр. Уны юғалттылармы? Килмәй тип уйланылармы, көтәләрме? Әллә килмәһә йәтеш булыр, тынысыраҡ йәшәрбеҙ тиҙәрме? - ошондай уйҙар борсой уның күңелен. Үгәй атаһы менән әсәһе, улар йәшәгән ҡасабаға килеп, Маринаны көс менән машинаға ултыртып алып киттеләр. Әсәһе уны бәргесләп тә алды. Ул ҡаршылыҡ күрһәтеп ҡарағайны, көсө етмәне. Етерлекме ни, улар өсәү, ә Марина… Ҡәҙире яҡлаша алманы шул. Бер туған апаһы менән әсәһе икәүләп уны машинаға төрткөләп керттеләр. Апаһы уның кеҫә телефонын тартып алып, Ҡәҙиргә: - Мине көтмә! Һинең янға башҡаса ҡайтмайым! Миңә ғәрип ир кәрәкмәй! Малдарҙы, өйҙө һат та аҡсаһын ебәр! Үҙең әсәйеңә ҡайт! - тип, тағы ла уны кәмһетеп, ғорурлығына тейә торған һүҙҙәр яҙып, СМС-тар ебәрҙе. Марина әсәһенән дә апаһынан да ҡото осоп ҡурҡа, сөнки улар ҡайтҡас та уҡлау менән туҡмап, тәнен күгәртеп бөтөрҙө. Өс көн инде бикләп, бер ҡайҙа ла сығармайынса тоттолар, тамағына тәғәм ризыҡ ҡапҡаны юҡ. - Ғәрип ирең менән тотмайым! Уны ҡарап ятҡансы, табып үҫтергән әсәйеңә хеҙмәт ит! – тип, ябып ҡуйҙылар. Бөгөн генә бәҙрәфкә нисектер ҡарауылһыҙ ебәрҙеләр, өс көн буйы ҡасмағанды, хәҙер ҡурҡыр, хәле лә юҡ, тип уйланылар күрәһең, етмәһә, ҡасып китһә нимә буласағын да ныҡлап төшөндөрҙөләр. Әгәр ҙә һиҙеп ҡалһалар, арттан эҙләп сығып, туҡмап кире алып ҡайтасаҡтар. Кисә Ҡәҙирҙең әсәһе Маринаны эҙләп килгән ине, әсәһе уларға: - Марина беҙҙә юҡ! Һеҙҙә ине бит, ҡайҙа ҡуйҙығыҙ ҡыҙымды? Сихырлап үҙегеҙгә ҡаратып алдығыҙ, табығыҙ! Сыхырсылар! – тип, битәрләп ҡыуып ҡайтарҙы. https://yaikrb.com/news/novosti/2026-10-09/r-yl-nazar-olova-k-g-yam-yr-hik-y-4839334