Бөгөн - башҡорт халҡының милли батыры Салауат Юлаевты иҫкә алыу көнө
Бөгөн - башҡорт халҡының милли батыры Салауат Юлаевты иҫкә алыу көнө ЯҠТЫ ДОҒАМ МИНЕҢ - САЛАУАТ! Иҫтәремдән һис тә сыҡҡаны юҡ – Хәтеремдә минең, аңымда. Йөрәгемде сардар итеп хисем, Ғәскәр итеп туплай ҡанымды. Әйләнәм дә киләм Салауатҡа! Тоҡандыра мине азатлыҡ! Батырҙары булған илемдең тип, Әйтеү бөгөн әллә ғазапмы? Һағындыра яҡты тәүәккәллек, Көрәш сәмен һуҙа фарманы. Ауазыңды эҙләп, Батыр, илдең Ҡай еренә генә барманым! “Салауат!” тип йырлы исемеңде Доға итеп алам телемә! Тәсбих әйтәһеңдер кеүек һаман Именлектәр теләп илеңә! Таңдарым да минең – Салауат ул! Ай-йондоҙло төнөм – Салауат! Төштәремдең изге яугиры ла, Ҡотло көнөм – өнөм – Салауат! Салауат, тип йырҙар башлайым да, Салауат, тип сығам көрәшкә! Салауат, тип маҡсаттарға менәм, Ауыҙлыҡлап алып һәр эште! Иҫтәремдән һис тә сыҡҡаны юҡ – Яҡты доғам минең – Салауат! Һиңә ғашиҡ заман ҡыҙҙарынан Рухи ғәскәреңдең уйҙарына, Батырҙарҙың ожмах туйҙарына Барып етһә ине был аят!.. Салауат!.. Лариса Абдуллина.