«Һеңлекәш» («Сестрёнка») фильмындағы игеҙәктәрҙе - Денис һәм Данис Ғүмәровтарҙы хәтерлә...
«Һеңлекәш» («Сестрёнка») фильмындағы игеҙәктәрҙе - Денис һәм Данис Ғүмәровтарҙы хәтерләйһегеҙме? Егеттәр 18 йәшлек тыуған көндәрендә төйәктәренә бүләк яһанылар – «Йәшел Башҡортостан» акцияһы сиктәрендә ағастар ултырттылар. Денис менән Данис Инйәр ауылынан, әле Башҡорт иҡтисад-хоҡуҡ колледжының III курсында уҡыйҙар. Егеттәргә 11 йәш булғанда режиссёр Александр Галибиндың «Һеңлекәш» фильмында төшөргә насип була – был Мостай Кәримдең «Беҙҙең өйҙөң йәме» повесы буйынса төшөрөлгән кино. Сьемкалар ҙа нәҡ Инйәр буйында бара һәм малайҙар өсөн был ысын мажараға әйләнә. Кешеләрҙең тыуған төйәктәре өсөн изге эштәр башҡарырға ынтылыуы – матур күренеш. Инйәр буйында кинола уйнаған Денис менән Данис бөгөн республиканың киләсәгенә үҙ өлөштәрен индерә – экологик акцияла ҡатнашты. «Йәшел Башҡортостан» көҙгө экологик акцияһының берҙәм көнөндә барлығы 3 мең ағас һәм 63 мең ҡыуаҡ ултыртылды, элекке йылдарҙа ултыртылған 11 мең ағас һәм ҡыуаҡ тергеҙелде. Сара 45 мең кешене берләштерҙе.