Сый-намыс – насыпны ёзеги — 24 июня 2026 г. в 12:01:18.745
Сый-намыс – насыпны ёзеги Герийланы Магомет бла Тлегурова Фарида тёрт сабий ёсдюредиле. Ала юйюр къурагъанлы жыйырма жылдан атлагъанды, андан 14 жылны уа ала Ново-Ивановское элде жашайдыла. Герийланы юйюр уланла бла байды: ала юч жаш бла къыз ёсдюредиле. Тамата Маратха 21 жылдан атлагъанды, ол билим алып, ишлеп башлагъанды. Кичи жашла Мурат бла Руслан школчуладыла – 11-чи эм 9-чу класслада окъуйдула. Къыз Сабина уа бешинчи классха жюрюйдю. Сабийлени чыгъармачылыкъгъа фахмулары барды – Мурат бла Сабина Маданият юйде музыка школгъа жюрюйдюле, гитараны, пианинону согъадыла. Марат да аны тауусханды. Руслан а спортну сайлагъанды – баскетбол эм волейбол ойнайды. Магомет бюгюнлюкде вахта амал бла ишлейди, юйюрню кереклерин жалчытыр ючюн, къолдан келгенни аямайды. Фарида уа, эрттегили кавказ тёреледеча, юйню от жагъасын сакълайды, сабийле ёсдюреди, аланы билимлерине, айныуларына къайгъырады, тюрлю-тюрлю кружоклагъа жюрютеди. Алай аны сюйген иши да барды – ол тортла этеди. Барысындан да татыулугъа уа сабийлери, жууукълары да бал бла этилгенни санайдыла. Жаланда бир жарсыу барды – сабийле тауча неда къабартыча сёлешмейдиле. «Ангылагъан этедиле, алай сёлешген а алыкъа къыйынды. Аталарыны къарындашы сёзлюк саугъалагъанды, ким биледи, энтта юйренирле», - дейди Фарида. Бюгюн дунияда хал алышынады, адамлыкъ ышанла учуз бола барадыла. Быллай кезиуде уа халкъгъа кесин сакъларгъа жаланда миллет тёреле болушурукъдула, деп акъыл этеди ол. - Биз эки миллетни келечилерибиз, алай ол ахырда сезилмейди: тёрелерибиз, адетлерибиз да бирдиле. Сабийлени халкъларыбызны тёрелерине, жыр, тепсеу байлыкъларына сейирлери уллуду. 28 мартда Малкъар халкъны жангырыууну кюнюне жораланнган байрамда Сабина тауча жырлагъан эди. Бизни таматагъа хурмет этерге, юйюр тёрелени сакъларгъа юйретгендиле, ол къаныбызгъа сингнгенди. Миллет энчиликле уллу къыралда сакъланыргъа болушхандыла, ол себепден сабийлени да жууукълагъа, халкъларыбызгъа, тарыхыбызгъа, тёрелерибизге хурметликде ёсдюрюрге кюрешебиз,-дейди ушакъ нёгерибиз. Бизни республикада миллетле аралы юйюрле кёпдюле. Ёмюрлени теренинден бери таулула, къабартылыла, оруслула, башха миллетлени келечилери бирге келишиулюкде жашап келедиле: маданиятыбызны, тёрелерибизни да байыкъландыра. - Къайынларым мени юйюрге кеслерини къызларынча къошхандыла. Жаланда ал кезиуде, тилни билмей, бир кесек жунчугъанма. Аз-аздан ангылап башлагъанма. Бирге болгъанлы 23 жыл озгъанды. Юйюрде адамлыкъ, бир бирге тынгылай билген, сый-намыс магъаналыдыла, миллетлеге уа даулашла башлансала юлешинедиле. Къайын аналадан тилеригим, юйюгюзге келин кирген кезиуде анга сууукъ болмагъыз. Сиз болушсагъыз, кёл этдирсегиз, ол неге да юйренирикди, юйюрню, тукъумну да сюерикди. Юлгюге кисими юйюрюмю келтирирге сюеме – таулула, къабартылыла, оруслула, тюрклюле да бардыла келинлени, киеулени араларында, алай биз бир юйюрбюз, юлешир затыбыз жокъду, тарыхыбыз, тёрелерибиз да бирдиле, -дейди Фарида. Ушакъ нёгерибизни бу сёзлерине уа ол бек алгъа хычинле этерге юйреннгени шагъатлыкъ этеди. «Бир байрамыбыз да бу татыулу ашсыз болмайды. Къайынларым алгъа къабарты-малкъар хычинле этгенсе, энди уа юйреннгенсе деп, лакъырла этиучюдюле»,- деп ышарады ол.