Оюм — 23 июня 2026 г. в 14:18:27.315
Оюм «Жазыгъыз, миллетибизни къанатландырыгъыз!» Газетни юсюнден оюмларын бизге окъуучуларыбыз билдиргенлей тургъанлары къууандырады. Бизни бар ишибиз, багъалы адамларыбыз, сизни ючюндю, газетибиз да халкъны газетиди, аны бир бетиди, шартыды. Бу кюнледе Тетууланы Хадисни жазылыу кампаниягъа чакъырыу сёзю интернет къауумлада жайылгъандан сора, бизге Къарачай-Черкесден Лепшокъланы Владимир да кесини жюрек сёзюн жазып жибергенди. Хурметли къарындашыбызны сёзюн газетни бетлеринде да туура этерге излегенбиз. - Сыйлы да, даражалы да къарачай-малкъар халкъым! Сёзсюз, миллетибизни кеси тилинде басмаланнган газети, журналы, китабы болургъа керекди. Барыбыз да бир болуб а тилибизни сакъларгъа, анга сакъ болургъа тийишлибиз. Ол затны юсюнде ана тилибизде чыкъгъан басманы магъанасы бек уллуду. Сары-Тюзде ёсгенме. 1962 жылда мектепде жайгъы солуу кюнледе, онючжыллыкъ жашчыкъ, элде эки ай почтачы болуп ишлеген эдим. Элде Рая Петренко эм Рая Сергеева деп эки почтальон болуучу эди. Элни эки бёлюп, алай ишлей эдиле да, бири отпускагъа кетсе, аны ишин да толтуруп тургъанма. Аламат заман! Ол кезиуледе элибизде газет алмагъан юйюр хазна жокъ эди. Аны къой да, къарачай тилде чыкъгъан «Ленинни Байрагъы» газетни бири къалмай хар арбазгъа келирча эте эдиле адамларыбыз! Окъуучула, газетни алыргъа ашыгъып, аллыма чыгъып сакълагъан чакъла да эсимдедиле. Заман тюрленнгенди, миллетибиз ол замандан бюгюнлюкде билимлиди, устады. Алай, не медет! Тилибизни, адетибизни, намысыбызны унутханла, ишлерге талпымагъанла да кёп болдула. Ишлемеген тишлемез дегенликни унутханла чыкъдыла. Да биз тилибизни, намысыбызны, энчи кесилигибизни унутсакъ, сора БИЗ КИМ БОЛЛУКЪБУЗ, КЪАЛЛАЙЛА БОЛЛУКЪБУЗ?! Ол себепден кесин миллет адамгъа санагъан кесибизни ана тилибизде, къарачай-малкъар тилде чыкъгъан газетлени, журналланы, китапланы алыргъа борчлуду. Газетчилерибизден, устазларыбыздан, жазыучуларыбыздан, жырчыларыбыздан бир тилеригим бар эди. Сиз миллетибизни чырагъысыз, сизни сёзюгюздю халкъыбызны бирлешдирлик, тюз жолда жюрюталлыкъ, ариу тилибизни, адетлерибизни, намысыбызны сакълатырыкъ. Хар жазгъаныгъыз, айтханыгъыз, жырыгъыз, назмугъуз, хапарыгъыз сейир болсун, миллетни жюрегин къууандырсын, жаш тёлю тюз жолла бла барырча этсин, билимге, бирликге, сыйгъа-намысха талпынып жашаргъа юйретсин. Барыбыз да бирлешип, ол жолну тутсакъ, тилибиз, адетибиз, намысыбыз, маданиятыбыз сакъланырла. Алай бла халкъыбыз насыплы болур, нек дегенде жаланда ёз тили, ёз намысы, менлиги сакъланнган адамла болаладыла миллет. Хурметли къарачай-малкъар тилде жазгъан къарындашларым, эгечлерим, тюзюн жазыгъыз, халкъыбызны къанатландырыгъыз. Басмаланнган затланы биз да олсагъатда, хар замандача, чабышып алгъанлай турурбуз. Сау болугъуз, къууанчларыгъыз кёп болсун, окъуучуларыгъыз андан да кёп! Эсен тюбешейик!