Тюз сайлау этгенине тюшюнюпдю — 12 июля 2026 г. в 12:53:50.182
Тюз сайлау этгенине тюшюнюпдю Малкъондуланы Феруза, Жулабланы Зарифни къызы, Хушто-Сыртда туугъанды. Мектепни тауусхандан сора, Къабарты-Малкъар къырал университетни школгъа дери билим бериу жаны бла бёлюмюн къызыл дипломгъа бошап, беш жылны сабий садда ишлегенди. 2022 жылда Нальчикде ол почта бёлюмге ишге киреди, адамла бла ишлеу, алагъа болушуу хычыуун кёрюнюп, тюз сайлау этгенине да тюшюнеди. Бир кесекден аны Нальчикден Каменка элде связь бёлюмге жибередиле. Мында да низамлы, ишин сюйген Феруза жамауат бла ариу жарашып, бет жарыкълы урунуп тебирейди. Бусагъатда почтачы нёгери Жаникаланы Алимат бла бир бирни ангылап ишлейдиле. Миллет тилледе чыкъгъан басма изданияланы юсюнден айта, Феруза аланы бютюнда сабийле окъусала иги боллугъун чертеди. «Ана тилни татыуун гитчеликден сезген къыйматлыды. Тилибиз байды, сейирди, жаш тёлю аны бла тынгылы хайырлана билсе, сагъышларын, оюмларын ангылаталса, бек ахшы боллукъ эди. Кесим окъургъа къачан да сюйгенме. Къарт аммам ана тилибизде чыкъгъан газетге жаздырмай къоймагъыз деп, къайтарып айтыучусу къачан да эсимдеди. Анда жаш тёлюбюзню спорт, илму, маданият, башха жаны бла да жетишимлерин, айтхылыкъ инсанызны юслеринден материалланы кёрсем, айхайда, кёлюм кётюрюледи, ёхтемленеме», - дейди ол. Каменка гитче эл болгъанлыкъгъа, Феруза газетни аслам адам излегенлерин, арт кезиуде уа аны жаш адамла да соруп башлагъанларын къууанып билдиреди. Алай эсе уа, келир жарым жылгъа жаздырыу андан да жетишимли болуруна ышанырчады. Суратда (солдан онгнга): Жаникаланы Алимат бла Малкъондуланы Феруза.