«Усталыгъым, юйюрюм, жерлешлерим – насыбымы сылтаулары» — 28 июля 2026 г. в 08:40:45.948
«Усталыгъым, юйюрюм, жерлешлерим – насыбымы сылтаулары» Тырныауузда Къулийланы Къайсын атлы маданият юйню костюмери Зулейхат Габибуллаеваны районда иги таныйдыла. Ол сайлагъан усталыгъында насыплы болгъан, ишин бийик даражада толтургъан адамды. Зулейхат кеси да бюгюн газетни корреспондентини ушакъ нёгериди. – Зулейхат, сабийлигингде къайсы усталыкъны сайлар умутлу эдинг? – Стюардесса болургъа бек сюйгенме. Баям, ол толмазлыкъ муратым эди. Нек дегенде, биринчиден, бийикликден бек къоркъама. Учуулада айланыргъа да. Экинчиден а, биз кёп сабийли юйюр болгъанбыз, беш сабийден экинчиме. Мени юйюрюм аллай узакълагъа жиберип окъутмазлыкъларын да ангылай эдим. Къалай-алай болса да, стюардесса къызланы тизгинлерине, аланы юслерине аламат жарашхан ариу кийимлерине бек бюсюрей эдим. – Тигиучюлюкге уа къалай келгенсе да сора? Сени муратынг бла аны арасында уллу башхалыгъы болгъан усталыкъ ушайды да? – Арада сагъышлансам, тёлюден тёлюге келген юйюр усталыгъыбыз болгъан сунама. Атам бла атамы эгечи да бу усталыкъда эдиле. Атам аякъ кийимни башдан аякъгъа тиге эди. Аны къол ызына бек бюсюрегенме. Андан сора да, кесим бир затланы туурап, ёнчелеп аланы келишдирип ойнаучу эдим, эрикмей. Ёсюмюм да гитчечик болгъаны себепли юсюме тийишли жарашхан кийим тапхан да къыйын болуучу эди. Баям, бу сылтаула, барысы да бирге жашаууму ызын белгилеп, бу усталыкъ бла байлагъан болурла. Ушакъны газетни бетлеринде окъургъа боллукъсуз.