Алда – кёп ахшы умутла — 24 июля 2026 г. в 13:37:14.027
Алда – кёп ахшы умутла Быйыл биз газет окъуучуларыбызны мектеплени шёндю бошап, алтын майдаллагъа тийишли болгъан, ЕГЭ-леде да бийик жетишимле болдургъан жашларыбызны бла къызларыбызны танг кесеги бла шагъырейлендиргенбиз. Кетенчиланы Мурат да аллайларыбыздан бириди. Ол Нальчикни 13-чю номерли гимназиясын айырмалы бошагъанды. Борчлу эмда сайлау халда берген Бир къырал сынауларыны барысындан да сексенден аслам балла алгъанды. Сёз ючюн, аны обществознаниядан эсеби 88 баллды. Айхай да, репетиторгъа бир кюнню да жюрюмей, мектепде устаз берген билим бла бирге онлайн халда дерслени хайырланып, аллай даражагъа жетгени уа окъуучуну иш кёллюлюгюн, окъургъа талпыннганын ачыкълайды. Ол кеси да: «Ишни берген, ангылатхан да устазды, аны тамамлагъан а сабий кесиди», - дейди. Бизни къысха ушагъыбызгъа аны анасы Лейля да къошула, гимназияны устазлары аллай ышаннгылы билим бергенлери ючюн барысына да ыразылыгъын билдиргенди. Сабий эринмесе эмда эрикмесе, ишлерин билген педагогла анга жол кёргюзталлыкъларын айтханды. Мурат мектепде обществознание дерсни бирсиледен айырып жаратханды эмда анга асламыракъ эс да бургъанды. Андан ЕГЭ-ге уа кеси аллына тогъузунчу классдан хазырланып башлагъан эди. Белгилисича, сабийле тогъузунчуну бошагъанларында да сайлау халда эки дерсден сынаула бередиле. Кетенчи улу уа аладан бирине сагъынылгъан дерсни сайлагъанды эмда андан бюгюнлюкде аллай бийик балл алгъанына уа анга алгъадан хазырланнганы себеплик этгенине ийнанады. Ол биринчи классдан да иги окъугъан сабийлени санында болгъанды. Дерследе айырмалы болгъанындан тышында да, спортну сюеди. Къайсы жаш адамча, тенглери бла бирге топну къууаргъа угъай демесе да, спортну устасына кандидат даражагъа да жетгенди. Мурат биринчи классха жюрюп тебиреген кезиуюнден да, спорт бла кюреше, тхэквондодан жараулагъа баргъанды. Бу жаны бла аны тренер Балаланы Элдар юйретгенди. Кетенчи улуну тхэквондодан къара бел бауу барды, Европаны – эки, Россейни уа тёрт кере да чемпиону болгъанды, Дунияны кубогун да хорлагъанды. Ол алыкъа хорлам болдургъан болмаса, биреуге да къытдырмагъанды. Баям, спортха, обществознание дерсге сюймеклиги аны усталыкъ сайлаууна мурдор да болгъандыла. Ол бюгюнлюкде Москвада МВД-ны академиясына кирирге хазырлана турады. Бу кюнледе окъуу юйню кесинде да орус тилден, обществознаниядан, спорт жаны бла хазырлыкъдан сынаула бере турады. Алай эсе да, окъуугъа, спортха да бирча итиниулюгю болгъан Мурат аланы да жетишимли берир деп ышаныргъа боллукъду. Жанкишиланы Натэлла уа Тёбен Чегемни битеулю билим берген мектебин бошагъанды майдалгъа. Ол да сайлау халда обществознанияны бла тарыхны бергенди. Математиканы уа мурдорлу тюрлюсюнден «беш» алгъанды. Бу дерсден а аны окъутхан эмда юйретген Байтуугъанланы Мусабийди. Натэлла Мусабий Ахматович хар окъуучугъа да бир кибик къайгъыргъанын, аланы сынаулагъа тынгылы хазырлагъанын айтады. «Математиканы мурдорлу тюрлюсюнден эм бийик эсеп 21 баллды да, аланы барысын да алгъаным устазым окъуулу-билимли болгъаны, кесини билимин окъуучулагъа да бере билгени ючюндю. Биз анга барыбыз да ыразыбыз», - дегенди. Къызчыкъ къагъытларын КъМКъУ-ну юристле хазырлагъан бёлюмюне бергенди. Мураты толса, юрист болуп, адамланы эркинликлерин къорууларыкъды. Бош заманыда уа ол суратлау чыгъармаланы окъургъа да сюеди. Андан сора да, сабийлени бла жаш тёлюню «Биринчилени атламлары» Битеуроссей жамауат-къырал къымылдаугъа тири къатышады. Окъуугъа жетишимли кирип, студент болса да, бу жумуш бла кюрешгенлей турур умутдады.