⚜️Олохтоох мусуойга сыл-дьан саҥа экспонаттары көрдүм-иһиттим. Түмэл улуус биир баай, д...
⚜️Олохтоох мусуойга сыл-дьан саҥа экспонаттары көрдүм-иһиттим. Түмэл улуус биир баай, дириҥ устуоруйалаах, элбэх экспонаттаах тэрилтэтинэн буолар. Нэһилиэк быйыл саас төрүттэммитэ 260 сылын бэлиэтээбитэ. Онон нэһилиэк устуоруйатыгар, түмэл түмүллүүтүгэр дириҥ кылааттаах дьоҥҥо аналлаах саҥардыллыбыт муннукка болҕомтобун уурдум. Манна В.Е.Третьяков, П.Ф.Бубякин, А.М.Федоров, Ю.Н.Винокуров, В.Д.Батюшкин, Д.И.Винокуров, Ю.А.Винокуров, Е.Г.Томская, Е.И.Колесова өҥөлөрө суруллубуттар. Анал байыаннай дьайыы кыттыылааҕа Михаил Созонов-Север, нэһилиэк Бочуоттаах олохтооҕо, подполковник В.В.Винокуров дьиэ кэргэттэрин көмөлөрүнэн оҥоһуллубут муннуктары, уо.д.э. саҥа экспонат баарын сэргии көрдүм. Түмэл сэбиэдиссэйэ Юлия Винокурова 4100 экспонат баар диэн кэпсээтэ. ❣️Бу курдук, дойдум быйылгы сайыныгар аҕыйах хонуктаах уоппускам күннэрэ биллибэккэ аастылар. Бөһүөлэгим ураты тыына, сибиэһэй салгына, ыраас уулаах күөллэрэ, тыатын аайы уйгулаах быйаҥа, ото-маһа, отоно, дьоллоох оҕо сааһым ааспыт төгүрүк тэлгэһэлэрэ угуйа-ыҥыра хааллылар. Нэһилиэгим барахсан сатабыллаах салайааччыларынан, үлэһит дьонунан, дойдумсах ыччатынан тирэҕирэн, ханнык да ыарахаттары бары күүһүнэн, бэйэ-бэйэҕэ көмөлөөх майгыларынан тумнан, нэһилиэкпит үүнэ-сайда туруоҕа, тыа сиригэр олох өрүү баар буолуо диэн бигэ эрэнэ хаалабын, кылгас суруйуубун түмүктүүбүн. Саргылана Кокорина @khalymadolgunnara @ulusmedia