Кок арня гыч у тунемме ий тÿҥалеш. — 19 августа 2026 г. в 14:24:16.147
Кок арня гыч у тунемме ий тÿҥалеш. Тидын вашеш Российысе просвещений министерстве тыгай темлымаш дене лектын. Школлаште икымше классыш толшо-влакым сентябрь да октябрь тылзылаште яндар южыш луктын, каналташ йöным пуаш. Тидлан 40 минут деч шагал огыл жапым ойыраш. Тиде темлымашым методике материалыш пуртымо. Тыгак Россий министерстве урок расписанийымат вашталташ да кокымшо ден кумшо урок-влак деч вара переменым 20 минут деч шагал огыл эртараш темлен. Тидын деч посна икымше классыш толшо-влаклан урок жапыштат физкультминутко манмым чÿчкыдынрак эртараш кÿлмö нерген ушештареныт. Тений гыч илышыш шыҥдаралтше эше икмыняр вашталтыш нерген ойлаш гын, южо школышто койыш-шоктышлан – вес семын ойлаш гын – поведенийлан оценкым пуртымым палемдыман. Мемнан республикыште гын, тыгай школ радамыш 10 тÿрлö туныктыш тöнеж логалын. Нунын коклаште – Козмодемьянскысе школ-интернат, Морко районысо Октябрьский школ, Параньга районысо Кугу Пумарий школ, Йошкар-Оласе 14-ше гимназий, 23-шо школ, политехнический школ-интернат да молат.