Звенигово районышто «Земский доктор» программе дене ныл врач пашам ышташ тӱҥалын.
Звенигово районышто «Земский доктор» программе дене ныл врач пашам ышташ тӱҥалын. Тиде травматолог-ортопед, анестезиолог-реаниматолог, тыгак стоматолог-влак. Звенигово рӱдӧ эмлымверын тӱҥ врачше Михаил Охотников палдарен, «Продолжительная и активная жизнь» нацпроектын «Медицинские кадры» проектше дене земский пашаеҥ программе-влак районышто сайын шукталтыт. Ушештарен кодаш лиеш, 2024 ийыште районысо эмлымверыш кок участковый терапевт, тыгак Шемшӱргӧ ФАП-ыш фельдшер толыныт. 2025 ийыште Суслонгер врачебный амбулаторийыш педиатр, Какшамарий да Красногорский эмлымверыш кок терапевт, Элнер ФАП-ыште фельдшер пашам ышташ тӱҥалын. 2026 ийыште «Земский доктор» программе дене невролог, участковый терапевт, хирург, гинеколог, инфекционист, кардиолог, ЛОР-врач, психиатр да офтальмологым республикысе эмлымверлаш налшаш улыт. Тидын дене пырля «Земский фельдшер» программе дене Звенигово, Килемар, Марий Турек, Медведево да Шернур районлаш специалист-влак толыт. Тазалыкаралтыш министерстве палдара, тений 18 врачым да кокла шинчымашын 7 специалистым нине программе дене налыт.