Вес ийын Марий Элыште тазаҥдыме кум рӱдерым капитально ачалат.
Вес ийын Марий Элыште тазаҥдыме кум рӱдерым капитально ачалат. «Сосновая роща» тунемме-тренировкым эртарыме базыште медпунктым да пищеблокым уэмдат, «Лесная сказка» комплексыште медпунктым да канаш келыштарыме кумдыкым шотыш кондат, Володя Дубинин лӱмеш рӱдерыште пищеблокышто пашам шуктат. Тидын нерген Марий Эл Правительствын заседанийыштыже ойленыт. Тудым регион вуйлатыше Юрий Зайцев эртарен. Тений кеҥежым лагерьлаште да санаторийлаште 28 тӱжем утла йоча канен. Тиде тылеч ончычсо идалык дене таҥастарымаште 1000 утла еҥлан шукырак. Регионысо квото дене 143 йоча «Артек», «Орлёнок», «Смена» да «Океан» рӱдерлаш миен. Посна кугу тӱткыш неле илыш ситуацийыш логалше икшыве, СВО участник-влакын йочаштлан ойыралтеш. Тений тиде радам гыч 1872 йоча лагерьыште канен. Фото: vk.ru/yvzaitsev