Ыам ыйын 18 күнүгэр Мүрүтээҕи уолаттар гимназияларыгар киэн туттар биир дойдулаахпыт В.... — 18 мая 2026 г. в 12:30:42.246
Ыам ыйын 18 күнүгэр Мүрүтээҕи уолаттар гимназияларыгар киэн туттар биир дойдулаахпыт В.В. Никифоров-Күлүмнүүр төрөөбүтэ 160 сылыгар аналлаах “Үйэлэр уҥуордарыттан күлүмнүү туруоҕа” үөрүүлээх линейка буолла. Күлүмнүүр - саха бастакы көлүөнэ интеллигенциятын баһылыга, Сахабыт сиригэр үөрэҕи-сайдыыны тарҕатыыны турууласпыт биллиилээх общественнай деятель, суруйааччы, сахалыы маҥнайгы драма ааптара, уус-уран тылбааһы саҕалааччы, сахалыы бэчээти төрүттээччи, Саха сиригэр музейнай дьыаланы көҕүлээччи, Сахабыт сиригэр тэриллибит икки улахан экспедиция кыттыылааҕа. Кини Дьокуускайга публичнай библиотеканы тэрийээччи, үөрэҕи-сырдыгы тарҕатааччы, араас өрүттээх культурнай-сырдатар үлэни көҕүлээччи. Гимназистары бу бэлиэ күнүнэн дириэктэр Валерий Валерьевич Рожин, "Күлүмнүүр, күлүмнээ!" бырайыак ааптара уонна салайааччыта Наталия Васильевна Бурцева, Күлүмнүүр сыдьааннара саха тылын, литературатын учуутала Мария Семеновна Жиркова уонна 9 кылаас үөрэнээччитэ Виталий Копырин эҕэрдэлээтилэр. 10 кылаас уолаттара биир дойдулаахтарбыт И. Мигалкин, И. Сыроватскай “Күлүмнүүр, күлүмнээ!” хоһооннорунан уус-уран дьүһүйүүнү доргуччу аахтылар. Күлүмнүүргэ аналлаах үөрүүлээх линейка Николай Босиков "Күлүмнүүр күлүмнээ" хоһоонун күргүөмүнэн ааҕыынан түмүктэннэ.