Арыылаах эбэҕэ "Муҥха - 2026"
Арыылаах эбэҕэ "Муҥха - 2026" Сэтинньи 6 күнүгэр, Дьабыыл нэһилиэгин Арыылаах эбэтигэр, үтүө үгэскэ кубулуйбут сылын ахсын улуус аҕа баһылыга Дмитрий Иванович Тихонов көҕүлээһининэн ыытыллар улуус үөрэнээччилэрин "Муҥха - 2026" тэрээһинэ үөрүүлээхтик буолан ааста. Тэрээһиҥҥэ 12 оскуолаттан 140 оҕо кыттыыны ылла. Мэлдьэхси орто оскуолатыттан 9 уол, оскуола дириэктэрэ Кирилл Дмитриевич салайааччылаах, муҥхаҕа көхтөөх кыттыыны ылан кэллибит. Бу тэрээһин кэнчээри ыччаты айылҕаҕа сыһыарыыга, төрүт дьарыкка уһуйууга, холкутук уонна дьулуурдаахтык үлэлииргэ туһуланна. Оҕолор балыктааһын кистэлэҥнэрин биллилэр, айылҕаны харыстыырга үөрэннилэр. Биир дойдулаахтарбыт муҥхаҕа түмсүүлэрэ, күүстэрин холбоон, саха омук ытык үгэстэрин салҕыырга көҕүлүүр. Тэрээһини хаһыс да сылын көҕүлээн тэрийэр улуус аҕа баһылыгар Дмитрий Тихоновка, улуус администрациятыгар, үөрэх салалтатыгар улахан махталбытын тиэрдэбит. Арылхан Сокольников, «Үктэл» медиа-киин
Канал в каталоге Максиметера
151 подписчиков · Школы и вузы