Ыам ыйын 8 күнүгэр Кыайыы күнүн ураты түгэнэ – Сэлэлээн хаамыы ыытылынна. — 9 мая 2026 г. в 11:15:53.439
Ыам ыйын 8 күнүгэр Кыайыы күнүн ураты түгэнэ – Сэлэлээн хаамыы ыытылынна. Үөрэнээччилэр уонна учууталлар сэрии толоонугар олохторун толук уурбут, Улуу Кыайыы иһин кыргыспыт дьоҥҥо убаастабылларын көрдөрөн, миитиҥҥэ тоҕуоруһа муһуннулар. Кэлбит ыалдьыттары, Үлэ уонна тыыл бэтэрээннэрин «Нооһой сиэттэрэ» литературнай түмсүү уолаттара уонна 2 кылаас үөрэнээччитэ Алисия Иванова истиҥник эҕэрдэлээтилэр. Бу күн олохтоох дьаһалта үлэһиттэрэ ыалдьыттары «Саллаат хааһытынан» күндүлээтилэр. «Мэлдьэхси нэһилиэгэ» ТСТ дьаһалтата Үлэ, тыыл бэтэрээннэригэр сэмэй бэлэҕи туттаран, кинилэр үөрүүлэрин үксэттэ. Бу күн 5-11 кылаас үөрэнээччилэригэр «Кыайыы суола» диэн квест-оонньуу ыытылынна. Оонньуу түмүгүнэн: I миэстэ - Ваня Андросов хамаандата, II миэстэ - Виолетта Андросова хамаандата, III миэстэ - Арсен Брызгалов хамаандата буоллулар. Сэрии ыар сылларыгар «Кыайыы иһин! Эйэ иһин! Дьол иһин!» ыҥырыынан Аҕа Дойду көмүскэлигэр олохторун толук уурбут, Кыайыыны уһансыбыт дьоммут сырдык мөссүөннэригэр сүгүрүйэн, кинилэр хорсун быһыыларын санатан, «Өйдөбүнньүк чүмэчи» аахсыйаҕа үөрэнээччилэрбит, учууталларбыт көхтөөхтүк кыттан, хорсун дьоммутун ахтан-санаан аастылар. Сэрии уонна тыыл бэтэрээннэрин, кинилэр хорсун быһыыларын үйэтитии – биһиги бары ытык иэспит буоларын куруук өйдүөҕүҥ! Ким да умнуллубат, туох да умнуллубат! Андросова Виолетта 9 кылаас «Үктэл» медиа-киин