Ыам ыйын 26 күнүгэр А.В. Чугунов аатынан Мэлдьэхси орто оскуолатыгар чугдаарар лыҥкынас... — 26 мая 2026 г. в 11:50:14.203
Ыам ыйын 26 күнүгэр А.В. Чугунов аатынан Мэлдьэхси орто оскуолатыгар чугдаарар лыҥкынас чуораан арыалдьыттаах 11 кылаас үөрэнээччилэрин олох киэҥ аартыгар атаарар «Тиһэх Чуораан» үөрүүлээх тэрээһинэ ыытылынна. Быйылгы үөрэх дьылыгар 11 кылааһы 12 оҕо, 9 кылааһы 12 оҕо уонна 4 кылааһы 8 оҕо бүтэрэллэр. Выпускниктары истиҥ тылынан улуустааҕы успуорт салалтатын начальнига Алексей Артемович Попов, улуустааҕы үөрэх салалтатын информационно-аналитическай салаатын сүрүннүүр испэсэлииһэ Николай Анатольевич Петров, нэһилиэк аҕа баһылыга Валерий Георгиевич Никифоров уонна оскуола дириэктэрэ Кирилл Дмитриевич Титов эҕэрдэлээтилэр. Үөрэнээччилэри уонна учууталлары истиҥ, иһирэх тылынан эҕэрдэлээтилэр - выпускниктар төрөппүттэрэ. Кинилэр учуутал сыралаах үлэтигэр махтанан, сыаналаан сэмэй бэлэхтэрин туттаран үөртүлэр. Күндү выпускниктар! Бүгүн эһиги олоххут биир кэрэ кэмэ түмүктэнэр. Оскуолаҕа ылбыт билиилэргит, түгэннэргит умнуллубат өйдөбүл буолан олоххутун киэргэттиннэр. Дьоһуннаах олох суолун, ыра санааҕыт толору буоларын, үрдүк ситиһиилэри уонна биир кэлим эксээмэни ситиһиилээхтик туттаран ситии-хотуу аттестатын ылан, талбыт үөрэххитигэр үөрэнэн, дьоһун дьон буоларгытыгар баҕарабыт. Хаартыскалары бу сигэнэн киирэн көрүҥ: https://disk.yandex.ru/d/OO394wWzr84JSQ Арылхан Сокольников, «Үктэл» медиа-киин