Аан дойду дуобакка первенствотыгар - сахалар!
Аан дойду дуобакка первенствотыгар - сахалар! ♟️Алтынньы ый 19-31 күннэригэр Турция, Анталья куоратыгар ыытыллыбыт Аан дойду сүүс харахтаах дуобакка первенствотыгар Саха сирин хомуур хамаандатыгар Мэлдьэхси нэһилиэгин дуобакка кэскиллэрэ үрдүк таһымнаахтык кыттыыны ыллылар уонна кэккэ ситиһиилэри аҕаллылар. Оскуолабыт чиэһин 8-с кылаас үөрэнээччитэ Вова Николаев көмүскээтэ. Дьулуурдаах оонньууларынан II уонна III миэстэ буолары ситистэ. Маны таһынан, нэһилиэкпит, өрөспүүбүлүкэбит чиэһин элбэхтэ көмүскээн, дуобакка кэккэ ситиһиилэрдээх оскуолабыт 2025 сыллаах выпускнига, дуобакка спорт маастара Прокопий Говоров, 20 саастарыгар диэри ыччаттарга түргэн бырагыраамаҕа Аан Дойду кыайыылааҕа буолла! Чаҕылханныы түргэн уонна сүрүн программаларга үрүҥ көмүс мэтээллэри ылла. Бу саха дуобатын устуоруйатыгар дьоһун ситиһии буолар! Саха дуобатчыттара чаҕылҕанныы түргэн бырагыраамаҕа - 13, түргэн бырагыраамаҕа - 16, сүрүн бырагыраамаҕа - 14, сорудахтары суоттааһыҥҥа - 6 мэтээли, ол эбэтэр уопсайа барыта 49 мэтээли аҕаллылар. Ол иһигэр Мэлдьэхси дуобатчыттара 8 мэтээли иҥэриннилэр. ♟️Кинилэр ситиһиилэрин төрүөтэ, биллэн турар, кыһамньылаах үөрэх уонна сатабыллаах салайыы буолар. Оскуолабыт дуобакка тириэньэрэ, ССРС спордун маастара, СӨ үтүөлээх тириэньэрэ, элбэх оҕону дуобат кэрэ эйгэтигэр уһуйбут, үрдүк ситиһиилэргэ кынаттаабыт Василий Васильевич Куприянов бэйэтэ эмиэ кыттан, 60 үөһэ саастаах бэтэрээннэргэ түргэн уонна сүрүн бырагыраамалларга – II, чаҕылханныы түргэн бырагыраамаҕа III миэстэни ылары ситистэ. Кини бэйэтин холобурунан хас биирдии оҕоҕо кыайыыга дьулууру иҥэрэр, талааннарын таба арыйар. 🇷🇺Алтынньы 30 күнэ – Россияҕа тириэнньэр күнэ! Ити үөрүүлээх күнүнэн, ааспыт бырааһынньыгынан, Василий Васильевич Куприяновы тириэньэр күнүнэн ис сүрэхтэн эҕэрдэлиибит! Киниэхэ доруобуйаны, үлэтигэр өссө үрдүк ситиһиилэри, талааннаах үөрэнээччилэри баҕарабыт! ♟️Мэлдьэхси нэһилиэгин дуобатчыттара Аан дойду таһымыгар тахсан, өрөспүүбүлүкэбит уонна дойдубут аатын ааттаттылар! Кинилэринэн киэн туттабыт уонна инникитин да саҥа кыайыыларга, үрдэллэргэ дьулуһа туралларыгар, дьаныардаах дьарыгы баҕарабыт! Арылхан Сокольников, 10 кылаас үөрэнээччитэ, «Үктэл» медиа-киин, А.В. Чугунов аатынан Мэлдьэхси орто оскуолата, Мэҥэ Хаҥалас.