*Ытыктабыллаах Үөһээ Бүлүү улууһун олохтоохторо!*
*Ытыктабыллаах Үөһээ Бүлүү улууһун олохтоохторо!* *_«Үөһээ Бүлүү улууһа (оройуона)» муниципальнай оройуон дьаһалтатын аатыттан уонна тус бэйэм ааппыттан эһигини ГЕРОЙДАР күннэринэн ис сүрэхпиттэн итиитик-истиҥник эҕэрдэлиибин!_* Былырыын, Улуу Кыайыы 80 сыллаах үбүлүөйүн көрсө, улууспутугар ГЕРОЙДАР күннэрэ төрүттэммитэ. Быйыл иккис сылын, бу дьоһуннаах бырааһынньыгы бэлиэтиибит. Улуу Кыайыы үбүлүөйдээх сылыгар биһиги улууспут Россия Геройдаммыта. Ол курдук, 2025 сыл от ыйын 21 күнүгэр Алексей Рафаэлович Петров биһиги барыбыт киэн туттуубутугар Россия Геройун үрдүк аатын ылбыта. Билигин Үөһээ Бүлүү улууһа – түөрт ГЕРОЙ дойдута! *Ол курдук, Үөһээ Бүлүү улууһун Геройдара:* 🎖️Кэнтиктэн төрүттээх Советскай Союз Геройа, Аҕа дойду сэриитигэр олоҕун толук уурбут буойун-снайпер Алексей Афанасьевич Миронов. 🎖️Социалистическай Үлэ Геройдара – Туобуйа нэһилиэгин Молотов аатынан колхоз салалтатын бэрэссэдээтэлэ Степан Иннокентьевич Васильев уонна 🎖️колхоз сылгытын ферматын сэбиэдиссэйэ Афанасий Николаевич Саввинов. 🎖️Анал байыаннай дьайыы бэтэрээнэ, Российскай Федерация Геройа Алексей Рафаэлович Петров. Улуу Кыайыы хайдахтаах улахан сиэртибэннэн кэлбитин санаан көрдөххө: • Бүтүн Саха Сириттэн Аҕа дойдуну көмүскүү 62 000 кэриҥэ киһи ыҥырыллан барбыта. • Онтон Үөһээ Бүлүү улууһуттан 2163 киһи сэриигэ ыҥырыллан, Аҕа дойдуларын көмүскүү барбыттара. • Үлэ фронугар Кыайыыны уһанса 286 киһи биһиги улууспутуттан сылдьыбыттара. • Уоттаах сэрии хонуутугар, дойду туһугар 1131 саллаат олохторун толук уурбуттара. • Сэрииттэн тыыннаах 786 биир дойдулаахтарбыт эргиллэн кэлбиттэрэ. Маны сэргэ, Кыайыы туһугар Үөһээ Бүлүү улууһун дьоно-сэргэтэ хорсун саллааттарбыт кэннилэрин хаххалаан, сэрии фондатыгар – 2 794 429 солк. харчынан, 29 кг кыһыл уонна үрүҥ көмүһүнэн, 6470 устуука ичигэс таҥаһынан сүдү кылааттарын киллэрбиттэрэ. Аҕа дойду сэриитигэр Үөһээ Бүлүү улууһуттан үгүс дьоруойдарбыт үрдүк наҕараадаларынан бэлиэтэммиттэрэ: • «Аҕа дойду сэриитэ» 1-гы, 2-с степэннээх орденынан – Павлов Владимир Спиридонович; • «Аҕа дойду сэриитэ» 2-с степэннээх орденынан – 12 киһи; • «Слава» 3-с степэннээх орденынан – 24 киһи; • «Кыһыл сулус» орденынан – 23 киһи; • «Хорсунун иһин» (За отвагу) мэтээлинэн – 52 киһи наҕараадаламмыттара. • Тыыл үлэтигэр «Килбиэннээх үлэтин иһин» мэтээлинэн - 1489 киһи наҕараадаламмыта. Билигин даҕаны буола турар анал байыаннай дьайыыга, Аҕа дойду сэриитигэр фашистары кыайбыт көлүөнэ сиэннэрэ, хос сиэннэрэ, фашист-немецтэри утары сэриилэспит хонууларга аны украина-фашистары утары охсуһаллар. 1941-45 сылларга сэрии фондугар дьоммут-сэргэбит харчынан, көмүһүнэн, таҥаһынан хомуйан ыыппыттарын курдук, аны билигин анал байыаннай дьайыыга сэриилэһэ сылдьар уолаттарбытын өйөөн, бары бүддьүөт үлэһиттэрэ биир күннээҕи хамнастарыттан, улууспут бары олохтоохторо гуманитарнай баһыылкаларынан көмөлөһөн, Кыайыы туһугар кылааттарын киллэрэллэр. 1945 сыллаахха фашизмы суулларан Улуу Кыайыыны ситиспиппит курдук, сотору кэминэн саҥа Кыайыы хайаан даҕаны кэлиэ, уолаттарбыт дойдуларыгар эргиллэн кэлиэхтэрэ диэн күүстээх итэҕэллээхпит, эрэллээхпит! Өрүү күүс-көмө, тирэх буола турар улууспут олохтоохторугар барҕа махталбын тиэрдэбин! Барыгытыгар чэгиэн доруобуйаны, эйэлээх халлааны, дьолу-соргуну баҕарабын! Ытыктабылы кытта, Үөһээ Бүлүү улууһун баһылыга В. В. Николаев. #ДеньГероев #7мая #ГеройдарКүннэрэ #ҮөһээБүлүү T.me/ValeriNikolaev