Үтүө дьыалаҕа кыттыһан мас олортулар — 23 июня 2026 г. в 03:41:03.236
Үтүө дьыалаҕа кыттыһан мас олортулар Лариса Кимовна Дорофеева23.06.26 12:28  Бэс ыйын 19 күнүгэр Сүлэ нэһилиэгэр Ньурба 1-кы нүөмэрдээх оскуолатын 1976 сыллаахха бүтэрбит 10 «д» кылаас выпускниктара 50 сыллаах үбүлүөйдэрин бэлиэтээн, сынньалаҥ пааркаҕа тахса сырыттылар. Көрсүһүүнү Егорова (Винокурова) Тамара Петровна уонна Матвеева Анна Егоровна көҕүлээтилэр. Кинилэр кылаастарын оҕолоро оскуоланы бүтэрэр сылларыгар өрөспүүбүлүкэ араадьыйатыгар «Школа — производство, ВУЗ» диэн девиһинэн салайтаран ыҥырыы таһаарбыттар. Оччолорго кылааһынан сүбэлэһэн баран, тыа сиригэр тахсан үлэлииргэ быһаарыммыттар. Ол курдук Сүлэҕэ кэлэн торбос көрүүтүгэр, ыанньыксытынан үлэлээбиттэр. Көрсүһүүгэ комсомольскай путевкалара, производственнай характеристикалара уонна ол саҕанааҕы значоктара баара сөхтөрдө. Ол саҕана «Аргыс» комсомольскай фермаҕа олус үчүгэйдик үлэлээн баран, үөрэххэ туттарса барбыттар эбит. Тамара Петровна кылааһын аатыттан маннык баҕа санааларын тиэртэ: «Төрөөбүт Сүлэбит сайда, үүнэ, чэчирии турарын истэбит, билэбит уонна наһаа үөрэбит. Оскуола оҕолоругар, эдэр ыччаттарга — төрөөбүт нэһилиэккитин таптааҥ, кини тупсарын туһугар куруук кыһаллыҥ, сүрдээх үчүгэйдик үөрэниҥ». Ону тэҥэ сынньалаҥ паарката сайда турдун диэн «190 үтүө дьыалаҕа» кыттыһан, акация, бузина, хатыҥ уонна моонньоҕон олордон, 44-с үтүө дьыаланы оҥордулар. Оскуола лааҕыр оҕолоро кэлэн киэргэттилэр, мас олордуутугар илии-атах буоллулар. Олус үчүгэй, туспа суолталаах тэрээһин буолла. Маннык үтүө дьыалалар үксүү турдуннар! 1976 сыллаах выпускниктарга барҕа махтал! Марина Герасимова @gazetanyurba @ulusmedia