Бэс ыйын 20-21 күннэригэр Ньурба оройуонугар 2026 сыллааҕы уһулуччулаах салайааччы, бэр... — 23 июня 2026 г. в 11:09:53.472
Бэс ыйын 20-21 күннэригэр Ньурба оройуонугар 2026 сыллааҕы уһулуччулаах салайааччы, бэриниилээх судаарыстыбаннай уонна бэлитиичэскэй диэйэтэл Степан Васильевич Васильев төрөөбүтэ 130 сылыгар аналлаах «СОМОҔО КҮҮС. ТАЛБА ТАЛААН. ҮРДҮККЭ ДАБАЙЫЫ» алгыс ыһыаҕа буолан ааста. Бу күннэргэ Сүлэ нэһилиэгин дьоно-сэргэтэ биир киһи курдук сомоҕолоһон, кыттыыны ылан, уопсай түмүгүнэн 57 бааллаах 18 нэһилиэк кыттыбытыттан төрдүс миэстэ буоллубут. «Саха мала-сала — саха олоҕо-дьаһаҕа» үгэскэ олоҕурбут саха малын күрэҕэ быйыл нэһилиэктэр түһүлгэлэригэр икки күн устата ыытылынна. Сыаналаныытыгар маннык көрдөрүүлэр учуоттаннылар: саха норуотун олоҕор-дьаһаҕар туттар мала-сала, эр киһи, дьахтар уонна оҕо аймах төрүт таҥаһын арааһа, уруу таҥаһа, ыалдьыттары көрсүү сиэрэ-туома, түһүлгэни көмүскээһин уонна ыһыах тиэмэтин арыйыы. Түһүлгэ быыстапкатыгар норуот маастара Андреева С.А., мас ууһа Андреев Ю.И., иистэнньэҥнэр Никифорова М.П., Николаева В.М., Антонова М.Н., Амбросьева Е.И., Герасимова М.Ф., Афанасьева Е.В., Алексеева А.В., Рахимова А.А., Степанова С.Г. оҥоһуктара туруоруллубуттара. Бу күрэххэ нэһилиэк түһүлгэтин көрүүтүгэр 5-с миэстэ буоллубут. «Хорчуоппа-2026» оройуоннааҕы нэһилиэктэр икки ардыларынааҕы күрэҕэр атыы түһүлгэтин киэргэтиитин, санитарнай нуормалары тутуһууну, атыыһыт таҥаһын, төрүт сахалыы ас арааһын, икки күнү быһа тохтобула суох үлэлээһини сыаналанан 4-с миэстэ буоллубут. Сүлэ нэһилиэгин түөрт түөлбэтэ бары кыттыһан, икки күнү быһа тохтобула суох ас астаан, дьону сибиэһэй аһылыгынан күнүстэри-түүннэри хааччыйа турдулар. Дьон-сэргэ сөбүлээн төннөн кэлэ-кэлэ атыыласта: Валентина Прокопьевна үөрэтин миинин, минньигэс саламаатын, Саргылаана Васильевна рецебинэн сып-сымнаҕас лэппиэскэтин уонна сахалыы баахылатын, Станислав Афанасьевич сыалаах сахалыы-махалыы эт миинин. Надежда Геннадьевна Филиппова 45 үтүө дьыаланан атыыга өлгөмнүк быырпах уонна морс босхо биэрэн эбии харчы киллэрдэ. Икки күн түмүгүнэн хорчуоппаҕа барыта 162 630 солк. киирдэ, онтон 5 000 солк. арендаҕа төлөнөн, 157 630 солк. киирбит үп кинигэ бэчээттэниитигэр барар. «Ньурба Боотура» дэгит күрэххэ, биир бастыҥ түһүлгэтигэр күүстээхтэр, быһыйдар күөн көрсүһүүлэрэ буолла. 13 нэһилиэк боотурдара күөн көрсүстүлэр, кыайыылааҕынан Сүлэ нэһилиэгиттэн Шойдак Начын (Ньурбатааҕы баһаарынай сулууспа үлэһитэ) таҕыста. Нэһилиэк аатыттан кыайыытынан эҕэрдэлээн сэртипикээт туттарылынна. Начын өрөспүүбүлүкэ хамаандатыгар киирэн, Биробиджан куоракка баһаарынай сулууспа үлэһиттэрин күрэҕэр кыттаары сборга сылдьар эбит. Киниэхэ салҕыы күрэхтэригэр ситиһиилэри, кыайыыны-хотууну баҕарабыт! Ат сүүрдүүтэ нэһилиэктэр икки ардыларыгар саха аттарыгар 1600 м икки сүүрүү буолла. Кыра нэһилиэктэргэ 5 ат кытынна (Хаҥалас, Акана, Дьиикимдэ, Сүлэ, Ньурбачаан). Түмүгэр: 1 м. — Сюрприз (Ньурбачаан) 2 м. — Хаҥыл (Хаҥалас) 3 м. — Байыас (Дьиикимдэ) 4 м. — Бэргэн (Акана) 5 м. — Ураанньык (Сүлэ) Ат сүүрдүүтүгэр нэһилиэк чиэһин көмүскээбит Степанов Капитон Ивановичка уонна джокей Аркадий Михайлович Степановка махтал! Нэһилиэгинэн 8-с миэстэ. Норуот ырыаһыта Варвара Мисаиловна Васильева 100 сылыгар аналлаах «Өбүгэ быстыбат ситимэ-сомоҕо күүһэ» оһуокай күрэҕэр кыттыыны ыллылар: 18-35 саастарыгар дылы: Семенова Кэрэчээнэ Владимировна, Семенова Айна Николаевна; 35-55 сааһыгар: Абрамова Дарья Семеновна; 55 үөһээ ытык сааска: Никифорова Люция Даниловна, Иванова Раиса Алексеевна. Барыта 62 кыттааччы иһинэн Айна Семенова финалга киирэн «Уус-уран тыллаах этээччи» анал ааты ылла. Оһуокай күрэх түмүгүнэн нэһилиэгинэн 9-с миэстэ буоллубут. Василий Васильевич Степанов-Хомпуоһап 100 сылыгар аналлаах «Доллоһотуу» тойуксуттар улахан дьоҥҥо ыытыллыбыт күрэххэ нэһилиэк аатыттан Раиса Алексеевна Иванова кыттан 10-с миэстэ буоллубут.