Бэс ыйын 25 күнүгэр «Айыы Тайбыт» култуура киинигэр Василий Иванович Тимофеев нэһилиэк ... — 25 июня 2026 г. в 03:24:47.851
Бэс ыйын 25 күнүгэр «Айыы Тайбыт» култуура киинигэр Василий Иванович Тимофеев нэһилиэк дьонугар-сэргэтигэр кэлэн, Сүлэ нэһилиэгин туһунан кинигэтин суруйуутун хаамыытын иһитиннэрдэ. Василий Иванович быйылгы ыһыахха Сүлэ нэһилиэгэ 18 нэһилиэк иһигэр төрдүс миэстэ буолбутунан үөрүүтүн үллэһиннэ. Мунньах кэмигэр тэрилтэ салайааччылара бэйэлэрин тэрилтэлэрин туһунан иһитиннэриилэри хайаан да киллэрэр наадата бэлиэтэннэ. Онуоха Василий Иванович чуолкайдаан, ситэрэн-хоторон, бэйэлэрин аймахтарын тустарынан суруйан ыыталларыгар баҕа санаатын эттэ. Ахтыылар суруллан, бэчээттэнэн, эрэдээксийэҕэ ыытыллыахтаахтар. Кинигэҕэ Аҕа дойду сэриитин бэтэрээннэрэ, тыыл бэтэрээннэрэ, 1935 сылга диэри үлэлээбит 153 киһи, ону таһынан анал байыаннай дьайыы кыттыылаахтарын ахтыылара уонна кинилэр тустарынан матырыйааллар киириэхтээхтэр. Сүлэ нэһилиэгэр аҕыс аҕа ууһа баар. Василий Иванович билигин кинигэ информацията 70 бырыһыана хомуллан киирбитин, ордубут кыратын ситэрэн баран Розалия Петровна Осиповаҕа туттарарын иһитиннэрдэ. Редакторынан Розалия Петровна үлэлэһэр. Кинигэ 250 ахсаанынан бэчээттэниэхтээх, билиҥҥитэ 200 тыһыынча солкуобай төлөнүөхтээх. «Онон өйгүтүн-санааҕытын кинигэҕэ ууруҥ — кэнэҕэски кэлэр көлүөнэ оҕолорго өйдөбүнньүк хааларын курдук. Балаҕан ыйыгар барыта бүтүөн наада», — диэн Василий Иванович болдьохтоон, сүбэлээн эттэ.