УЛУУСТААҔЫ ҮРҮҤ ТУНАХ ЫҺЫАХПЫТ ҮӨРҮҮЛЭЭХ АРЫЛЛЫЫТА — 20 июня 2026 г. в 15:00:22.096
УЛУУСТААҔЫ ҮРҮҤ ТУНАХ ЫҺЫАХПЫТ ҮӨРҮҮЛЭЭХ АРЫЛЛЫЫТА Бүгүн, бэс ыйын 20 күнүгэр, Майа маанылаах ытык сирэ, Ураһалаах алаас, Саха норуотун сүрүн бырааһынньыгын – Үрүҥ Тунах Ыһыах түһүлгэтэ толору дьону-сэргэни түмтэ. Быйылгы үөрүүлээх Ыһыахпыт Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Мэҥэ Хаҥалас улууһугар Олохтоох оҥорон таһаарыы сылларыгар ананан, ураты суолталаахтык ыытылынна. Ыһыах үөрүүлээх арыллыытын улуус салалтата, ытыктабыллаах ыалдьыттар, улууспутугар олорор араас омуктар түмсүүлэрин бэрэстэбиитэллэрэ, үлэ бастыҥнара уонна кэнчээри ыччаттарбыт сэлэлии хааман, түһүлгэни эргиччи киэргэттилэр. Улуус баһылыга Ытык Дуоҕаны мустубут дьон-сэргэ дохсун ытыһын тыаһыгар ытык сэргэҕэ туруорда. Улуус баһылыга Дмитрий Тихонов, Ил Түмэн Бэрэссэдээтэлэ Алексей Еремеев, улуус дьокутааттарын Сэбиэтин бэрэссэдээтэлэ Иннокентий Андросов мустубут нэһилиэнньэҕэ алгыстаах эҕэрдэ тылларын анаатылар. Бу күн биир долгутуулаах түгэнинэн, биһиги киэн туттуубут, Арассыыйа үтүөлээх маастара, Паралимпиада үрүҥ көмүс призера, харбааһыҥҥа аан дойду уонна Дьобуруопа хас да төгүллээх кыайыылааҕа Анастасия Диодорованы успуорт улахан эйгэтиттэн үөрүүлээх быһыыга-майгыга атаарыы буолла. Кини ситиһиилэрэ кэнчээри ыччакка үтүө холобур буоларын бэлиэтээн, истиҥ махталы, алгыс тыллары эттилэр. Үөрүүлээх чаас кэнниттэн, ыһыахпыт биир кэрэ, ураты түгэнэ саҕаланна. Улуус баһылыга уонна ыҥырыылаах ыалдьыттар уйгуну-быйаҥы бэлиэтиир, күүһү-уоҕу көрдөрөр саха мааны оҕуһун сиэтэн, нэһилиэктэр түһүлгэлэрин кэрийдилэр. Хас биирдии түһүлгэ аайы ытык ыалдьыттары үөрэ-көтө көрүстүлэр, сахалыы далбардаах аһынан, кымыстаах чороонунан айах туттулар. Нэһилиэк баһылыктарын, үлэһит дьонун ыһыах ымыылаах күнүнэн истиҥник эҕэрдэлээн туран үрүҥ аһы бэлэх ууннулар. Түһүлгэни толорон, оһуохай дьиэрэйэн, норуот үөрүүтэ-көтүүтэ үксээтэ, сахабыт саргыта сандаарда. Мэҥэ Хаҥалас улууһун дьаһалтатын пресс-сулууспата