Бүгүн, бэс ыйын 8 күнүгэр, улуус дьаһалтатын актовай саалатыгар Россияҕа Социальнай үлэ... — 8 июня 2026 г. в 03:38:14.787
Бүгүн, бэс ыйын 8 күнүгэр, улуус дьаһалтатын актовай саалатыгар Россияҕа Социальнай үлэһит күнүгэр анаммыт улахан тэрээһин ыытылла турар. Бырааһынньыктааҕы мунньахха социальнай эйгэ үлэһиттэрэ уонна салайааччылара муһуннулар. Бүгүҥҥү кэрэ-бэлиэ күнүнэн ытык-мааны дьоммутун улуус Баһылыгын үпкэ уонна экономикаҕа солбуйааччыта Марфа Игнатьева истиҥник эҕэрдэлээтэ. Бастыҥ үлэлээх, үрдүк көрдөрүүлээх социальнай үлэһиттэргэ улуус Баһылыга Валерий Николаев уонна СР үлэҕэ социальнай сайдыыга министрэ Елена Волкова ааттарыттан махтал суруктары уонна бочуотунай грамоталары туттардылар. Онтон бүгүҥҥү тэрээһин ураты үөрүүлээх, долгутуулаах чааһынан социальнай көмүскэл управлениетын социальнай хааччыйыыга отделын салайааччыта София Ивановаҕа "СР социальнай сулууспатын туйгуна" үрдүк аат иҥэриллибитэ буолла. Быйылгыттан улуустааҕы социальнай көмүскэл управлениета тэрилтэ бэтэрээннэрин сырдык ааттарын үйэтитэргэ үлэлэһэр. Ол курдук, уһуннук салалта начальнигынан үлэлээбит Зоя Васильевна Тарабукина уонна кылаабынай специалиһынан үлэлээн ааспыт Мария Кирилловна Чомчоева ааттарынан анал бириэмийэлэр чулуу үлэһиттэргэ сыл аайы социальнай үлэһит күнүгэр туттарыллар буолуохтара. Бүгүн социальнай харалта управлениетын салайааччытынан өр кэмҥэ таһаарыылаахтык үлэлээбит Зоя Тарабукина аатынан харчынан бириэмийэни Зоя Васильевна бииргэ төрөөбүт балта Ксения Максимова Кэнтик нэһилиэгин социальнай үлэһитэ Надежда Еттяноваҕа, онтон ытыктыыр киһибит Мария Чомчоева аатынан бириэмийэни Мария Кирилловна быраата, Далыр нэһилиэгин социальнай үлэһит Аскалон Софронов управление уопуттаах специалист-эксперыгар Михаил Сибиряковка ытыс дохсун тыаһын доҕуһуолугар, үөрүүлээх быһыыга-майгыга туттардылар. Салгыы туһааннаах эйгэ специалистарыгар "Социальнай эйгэҕэ саҥа кэрдиис" диэн ааттаах төгүрүк остуол үлэтин саҕалаата.. Маннык баай ис хоһоонноох мунньах социальнай эйгэ үлэһиттэрин түмэр, бэйэ-бэйэлэрин кытта алтыһалларыгар, уопут атастаһалларыгар уонна кэлэр үлэҕэ саҥа сүүрээннэри киллэрэллэригэр улахан көмө буолар. Эбиэт кэннэ 14 ч. "Үс Хоһуун" спорт комплексыгар социальнай эйгэ үлэһиттэрин икки ардыларыгар араас көрүҥнэргэ спортивнай турнир ыытыллыаҕа. Улууспут олохтоохторо, көрдөөх-нардаах, ыһыылаах-хаһыылаах күрэхтэһиилэри кэлэн көрүҥ, сэргээҥ, күндү дьоммутун өйөөҥ диэн ыҥырабыт! Галина Васильева #Социальнайүлэһиткүнэ #Көмүскэл #Чиэстээһин