Бүгүн, бэс ыйын 17 күнүгэр, «Үс Хоһуун» стадиоҥҥа оҕолорго үһүс төгүлүн уһуну сүүрүүгэ ... — 17 июня 2026 г. в 07:03:23.832
Бүгүн, бэс ыйын 17 күнүгэр, «Үс Хоһуун» стадиоҥҥа оҕолорго үһүс төгүлүн уһуну сүүрүүгэ Саха сирин 15 төгүллээх кыайыылааҕа, элбэх төгүллээх рекордсмена, сахалартан бастакынан Советскай Союз спордун маастарыгар кандидат, Саха АССР спордун маастара, РФ спордун ветерана, Саха АССР физкультураҕа уонна спортка туйгуна, ХХ үйэ спортка лауреата, Үөһээ Бүлүү улууһун уонна Дүллүкү нэһилиэгин Бочуоттаах олохтооҕо Андрей Иванович Устинов сырдык кэриэһигэр республикатааҕы сүүрүү күрэҕин арыллыыта буолан ааста. Күрэххэ 6 хамаанда: Дьокуускай (тренер Аксинья Строева), Горнай, Нам (тренер Диана Тартакынова), Өймөкөөн (тренер Ульяна Винокурова), Мииринэй, Бүлүү (тренер Туйаара Рожина) уонна Үөһээ Бүлүү (тренердэр Инесса Окладникова, Николай Софронов) улуустарын эдэр сүүрүктэрэ кыттыыны ылаллар. Тэрийээччилэринэн Үөһээ Бүлүү оройуона, Дүллүкү нэһилиэгэ уонна Андрей Иванович оҕолоро, аймахтара буолаллар. Параадтаан киирбит хамаандалары улуус Баһылыгын 1-кы солбуйааччыта Егор Иванов, Дүллүкү нэһилиэгин баһылыга Николай Романов, үөрэх салалтатын иитэр үлэҕэ уонна эбии үөрэхтээһиҥҥэ салаатын салайааччыта Айаал Мохначевскай, Д.Е. Корякин аатынан оҕо спортивнай оскуолатын директора Павел Уйгуров уонна Андрей Иванович улахан уола, Ис дьыала министерствотын бэтэрээнэ, «АЛРОСА» ХЭТ сүрүннүүр тренерэ, «Гражданскай килбиэн» бэлиэ хаһаайына, СР физкультураҕа уонна спортка туйгуна, 2025 сыл түмүгүнэн Мииринэй оройуонун бастыҥ тренерэ Иван Устинов истиҥник эҕэрдэлээн туран, бу тымныы, хахсаат халлааннаах бэс ыйын 17-18 күннэригэр кытаанах санаа, бэйэ кыаҕар эрэл уонна кыайыыга дьулуур спортивнай майгыны уһааралларын эттилэр. Арыллыы өрөгөйдөөх түгэнигэр улуус Баһылыгын аатыттан чэпчэки атлетикаҕа СӨ үтүөлээх тренерэ Геннадий Николаевка, турнир комментатора Николай Боякиновка махтал суруктары, онтон чэпчэки атлетикаҕа РФ спордун маастарыгар, СӨ физкультураҕа уонна спортка туйгунугар Диана Тартакыноваҕа уонна турнир сүрүн тренеригэр Иван Устиновка Бочуотунай грамоталары улуус баһылыгын солбуйааччы Егор Иванов туттарда. Дүллүкү нэһилиэгин баһылыга Николай Романов улуус Баһылыгар Валерий Николаевка, улуустааҕы спорт управлениетын салайааччыта Егор Николаевка уонна Андрей Устинов оҕолоругар турниры тэрийиигэ кыттыыларын уонна өйөбүллэрин иһин махтал суруктары туттартаата. Оттон улуустааҕы спорт управлениетын аатыттан махтал суругу уонна сэмэй бэлэҕи Егор Алексеевич Андрей Устинов тапталлаах кыыһыгар, Чурапчыттан ытык-мааны ыалдьыппытыгар, Чурапчытааҕы оҕо саадын үлэһитигэр, чэпчэки атлетикаҕа СР 5 төгүллээх чемпионкатыгар, сүүрүүгэ улуус элбэх төгүллээх чемпионкатыгар, 2010 сыл бастыҥ спортсменыгар Ноябрина Дьячковская-Устиноваҕа үөрүүлээхтик туттарда. Быйыл 70 сааһын томточчу туолбут, бары ытыктыыр, убаастыыр киһибит, чэпчэки атлетикаҕа улуустан элбэх ааттаах-суоллаах спортсмены көччөх гынан көтүппүт улуу тренер Геннадий Николаевка оҕо спортивнай оскуолатын директора Павел Уйгуров Бочуотунай грамотаны кытта бэлэҕин утары уунна. Бэлиэтээн эттэххэ, күрэхтэһии биир кэрэхсэбиллээх түгэнинэн кыайыылаахтар ортолоругар сэрэбиэй быһыытынан iPhone 17 уонна Sony Playstation 5 игровой приставка оонньонор. Улуус олохтоохторо, бары сүүрүүнү таптааччылара күлүмэх сүүрүүлэри, республика ааттаахтарын кэлэн көрүҥ, сэргээҥ, сөбүлүүр спортcменнаргытыгар күүс-көмө буолуҥ! Спортсменнарга ситиһиини, ким күүстээх - ол кыайарыгар баҕарабыт! Галина Васильева #АндрейУстинов #Республикакүрэҕэ #Чэпчэкиатлетика