Үөһээ Бүлүү инникигэ эрэллээхтик хардыылыыр: Президент гранын пуондатыгар үс бырайыак к... — 17 июня 2026 г. в 02:06:46.301
Үөһээ Бүлүү инникигэ эрэллээхтик хардыылыыр: Президент гранын пуондатыгар үс бырайыак кыайда! 2026 сыллааҕы Президент граннарын пуондатын иккис куонкуруһун түмүгэ таҕыста. Дойду бары эрэгийиэннэриттэн уопсайа 1 426 коммерческайа суох тэрилтэ 4,28 млрд солкуобай суумалаах өйөбүлү ылла. Бу улахан ситиһииттэн биһиги улууспут эмиэ хаалсыбата! Ол курдук, Үөһээ Бүлүүттэн үс социальнай суолталаах бырайыак кыайыы өрөгөйүн бэлиэтээн, улууска 4 119 257 солкуобайдаах грант үбүн тарта. Кинилэр кимнээҕий? Киэн тутта ааттыыбыт: • «Оҥхой нэһилиэгин көхтөөх олоҕо» («Мин дойдум» Оҥхой нэһилиэгин олохтоохторун ассоциацията) — 691 580 солкуобай суумалаах грант. Бырайыак Липпэ-Атах сэлиэнньэтин аҕа саастаах олохтоохторугар доруобуйаны бөҕөргөтөр дьиҥнээх комплекс бэлэхтиир кыаҕы үөскэтиэ. Куттала суох эрчиллэр тэриллэр, скандинавскайдыы хаамыы, истиҥ көрсүһүүлэр – бу 60-тан тахса саастаах 72 киһиэхэ хамсаныы үөрүүтүн саҕар уонна соҕотохсуйууну утары охсуһуу буолар. • «Сомоҕолоһуу охторо: сахалыы оҕунан ытыыга инклюзивнай бырайыак» («Дьулуур» доруобуйаларынан хааччахтаах спортсменнар уонна дьон уопсастыбаннай тэрилтэтэ) — 2 179 538 солкуобай суумалаах грант. Оҕолор уонна эдэр ыччат, ол иһигэр доруобуйаларынан хааччахтаах оҕолор уонна тус сыаллаах байыаннай дьайыы кыттыылаахтарын дьиэ кэргэттэрин оҕолоро сахалыы оҕунан ытыынан дьарыктанар ураты былаһааккалара тэриллиэҕэ. Бырайыак спорду эрэ сайыннарбакка, бэйэ-бэйэҕэ көмөлөсүһүү, убаастаһыы уонна дьиҥнээх доҕордоһуу эйгэтин тэрийэр. • «Хотугу кирбии» («Үөһээ Бүлүү улууһугар спортинг сайдыытын киинэ») — 1 248 139 солкуобай суумалаах грант. Бэргэнник ытыы үгэстэрин уонна патриотическай иитиини сөргүтэр бырайыак. Көһө сылдьар лазертаг-тэрил көмөтүнэн 14–17 саастаах эдэр ыччат уонна устудьуоннар байыаннай дьайыылар бэтэрээннэрин салайыытынан тактическай медицинаҕа уонна сэби-сэбиргэли тута-хаба үөрэнэр кыахтаныахтара. Түгэнинэн туһанан, Үөһээ Бүлүү улууһун коммерческайа суох тэрилтэлэрин өйүүр киинн урукку салайааччыта Валентина Васильевна Христофороваҕа туох баар өйөбүлүн, көмөтүн, истиҥ сыһыанын иһин дириҥ махталбытын тиэрдэбит! Биир дойдулаахтарбыт кыайыыта – көҕүлээһин профессионализмы кытта холбостоҕуна, төрөөбүт улуус сайдыытыгар үбүлээһини хааччыйыы чаҕылхай холобура. Өйдөөҥ: үбүнэн өйөбүлү ылар кыахтар олус киэҥнэр! Президент граннарын пуондата, Президент культурнай инициативаларын пуондата (ПФКИ), СӨ Ил Дарханын граннара, Росмолодёжь уонна да атын куонкурустар барыгытыгар аһаҕастар! Өскөтүн эһиги улууспут олоҕун хайдах тупсарар, чэбдигирдэр эбэтэр интэриэһинэй оҥорор туһунан санаалаах буоллаххытына – туохтан да толлумаҥ! Үөрэниҥ, холонон көрүҥ, сайаапкалары биэриҥ! Аныгыскы куонкурус кыайыылааҕынан эһиги бырайыаккыт буолуон сөп. Сайаапканы оҥорууга көмө наада дуо? Үөһээ Бүлүү улууһун КСТ-лэри өйүүр ресурснай киинигэр билсиҥ:📌📌📌Аадырыһа: Ленин уул., 26 ☎️ Билсэр төлөпүөн: 8-984-109-9112 (Иванова Айталина Николаевна) Бары бииргэ Үөһээ Бүлүүбүтүн кыах уонна үүнүү-сайдыы сиринэн оҥоруоҕуҥ! Галина Васильева #Президентгранынфондата #Грантовайконкурс #Ресурснайкиин #НКО #Улууссайдыыта