Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, Үөһээ Бүлүү у... — 24 июня 2026 г. в 17:13:11.983
Арассыыйаҕа Норуоттар Сомоҕолоһууларын, Саха Өрөспүүбүлүкэтигэр Култуура, Үөһээ Бүлүү улууһугар Үөрэҕирии ситимэ төрүттэммитэ 150 сылыгар аналлаах «Үөрэх-билии биһигэ – Үөһээ Бүлүү» Үрүҥ Тунах ыһыах бастакы күнүн киэһэтигэр «Алгыс» түһүлгэҕэ «Күөх сирэм суугуна...» ырыа куттаах биир дойдулаахтарбыт, улууспут талба талааннаах ырыаһыттарын гала–концера улууспут ытык-мааны олохтоохторун уонна ыалдыттарын түмэ тарта. Бу киэһэ саамай күүтүүлээх уонна тыҥааһыннаах түгэнинэн «Сандаара Куо - 2026» кэрэ кыргыттар күрэхтэрин кыайыылааҕын быһаарыы буолла. Санатан эттэххэ, бу өр кэм устата ыытыллыбакка буолан баран быйыл сөргүтүллүбүт, Ыһыахпыт биир бастыҥ киэргэлэ буолар күрэх бастакы түһүмэҕэр барыта 8 нэһилиэк кэрэчээнэлэрэ кыттыбыттара. Ол курдук, Үөдугэйтэн Валерия Саннникованы, Кэнтиктэн Николь Сивцеваны, Оҥхойтон Амелия Михайлованы, Үөһээ Бүлүү нэһилиэгиттэн Света Егорованы, Дүллүкүттэн Нарыйа Бугулованы, Тамалакаантан Гея Руфованы, Намтан Мария Осипованы уонна Өргүөттэн Марфа Осипованы нэһилиэктэрин тойон-хаан Аҕа Баһылыктара харыстаан, бүөбэйдээн сиэтэн киллэрдилэр. Кыталык кыргыттар бэйэлэрин кылгастык билиһиннэрэн баран, киэн туттар биир дойдулаахпыт, биллиилээх дизайнер, маастар-модельер, «Zima» айар холбоһук уонна түүлээх салонун хаһаайката Алена Саввинова оҥорбут таҥастарын, симэхтэрин уонна күндү түүлээхтэн бэйэтэ тикпит саҥыйахтарын кэтэн, нарын бэйэлээхтик долгулдьуһа хаамтылар, угуйук быһыытынан бар дьонноругар көрдөрөн кэрэхсэттилэр. Бу барыта - Алена Саввинова бэйэтин эт илиитинэн оҥорбут, Аан дойду үрдүнэн хатыламмат, аар-саарга аатырбыт үлэлэр. Түмүгү Дьокуускай куоракка Үөһээ Бүлүү улууһун представительствотын салайааччыта, СР культуратын туйгуна Михаил Егоров бэрэссэдээтэллээх Тойон Сүбэ таһаарда. Ол курдук, чахчы да эрийсиилээх, сытыы күрэххэ нэһилиэктэрин чиэһин өрө тутан хорсуннук көмүскээбит кыргыттарбытыгар маннык анал ааттар иҥэрилиннилэр: «Нарыйаана Куо» - Мария Осипова (Нам), «Мичилийэ Куо» - «Валерия Санникова» (Үөдүгэй), «Кылаана Куо» - Марфа Осипова (Өргүөт), «Кэрэчээнэ Куо» - Гея Руфова (Тамалакаан), «Кыталыына Куо» - Нарыйа Бугулова (Дүллүкү), «Кэскилээнэ Куо» - Амелия Михайлова (Оҥхой), «Айталыына Куо» - Николь Сивцева (Кэнтик). Онтон бу уруйдаах түһүлгэ саамай үрдүк - «Сандаара Куо-2026» - аата Үөһээ Бүлүү нэһилиэгин аатыттан кыттыбыт Светлана Егороваҕа иҥэриллэн, кыыспыт дьол-соргу доҕуһуоллаах үөрүү үлүскэнигэр куустарда! Светаҕа сүрүн спонсор Алена Саввинова салона кииһинэн тикпит төбөҕө кэтиллэр симэҕин бэлэх быһыытынан хаһаайка бэйэтинэн туттарда! Маанылаах Ыһыахпыт түһүлгэтин киэргэппит, харахпытын сымнаппыт нарын-намчы, этиэхтэн кэрэ кыргыттарбытыгар дьол-соргу арыаллаах дьоһун олоҕу, кэрэ бэйэлэрэ өссө тупса, киэркэйэ туралларыгар баҕарыаҕыҥ! Галина Васильева #СандаараКуо2026 #ҮрүҥТунахыһыах