«Дорҕоон» түһүлгэҕэ салгыы Аан дойдутааҕы, Бүтүн Арассыыйатааҕы кэрэ көстүү, муода, этн... — 24 июня 2026 г. в 12:30:57.360
«Дорҕоон» түһүлгэҕэ салгыы Аан дойдутааҕы, Бүтүн Арассыыйатааҕы кэрэ көстүү, муода, этно-стиль күрэхтэрин кыайыыалаахтарын, айар үлэ абылаҥар ылларбыт, уран тарбахтаах киэн туттар биир дойдулаахтарбыт улууспут олохтоохторугар анаан истиҥ-иһирэх тыыннаах «Куорамыкы кыргыттара» тэрээһини ыыттылар. «Далбар Хотун» сурунаал сүрүн редактора, СР суруйааччыларын Сойууһун, РФ суруналыыстарын Сойууһун чилиэнэ Айталина Никифорова-Шадрина бу тэрээһини бэйэтинэн иилээн-саҕалаан ыыппыта кэрэхсэбиллээх. Илии үлэтинэн оҥоһуктар хаһан да хатыламмат айылгылаахтарын бу түһүлгэҕэ илэ харахпытынан көрөн итэҕэйдибит. «Киэргэ» ювелирнай дьиэ дизайнер-худуоһунньуга, элбэх харысхал ааптара, Дубайга ыытыллыбыт этническэй мода аан дойдутааҕы фестивалын кыайыылааҕа, былырыын Санкт-Петербурга буолан ааспыт мода фестивалын 1-кы миэстэтин хаһаайката Саргылаана Иннокентьевна Барахова-Ымыы «Мой род» диэн сөҕүмэр кэрэ коллекциятын көрдөрдө. Онтон Ольга Золотарева-Ураанай тимири уһааран оҥорбут оҥоһуктара, симэхтэрэ, харысхаллара, дьаҕалара (музыкальнай инструменнара) киһини соһуччу үөрдэр, кэрэхсэтэр аналлаахтар. Республикаҕа бастакынан симэх оҥоруутун саҕалаабыт «Оһуор утума» хампаанньа быйыл 30 сыллаах үбүлүөйүн көрсө эксклюзивнай симэхтэрин анаан-минээн аҕалан көрдөрбүтүн дьахтар аймах барыта ымсыыра көрбүт буолуохтаах. Бырааттыы Заболоцкайдар дьарыктанар сүрдээх быыккабай, уустук дьыалалара саха норуотун хайҕалын, махталын өрүү ыла турдун! Бүгүн биһиэхэ биир дойдулаахпыт, хампаанньаны төрүттээччи, маастар-ювелир, авторскай киэргэллэри айааччы Мария Заболоцкая ыалдьыттаан, дойдутун дьонун улаханнык үөртэ. Онтон биллиилээх дизайнер, маастар-модельер Алена Саввинова, «Zima» айар холбоһук уонна түүлээх салонун хаһаайката күндү түүлээхтэн бэйэтэ тикпит саҕынньахтара - тыл тиийбэт харах халтарыйар кэрэлэрэ! Бүгүҥҥү кэрэхсэбиллээх көрдөрүү кэмигэр М.Т. Егоров аатынан 2 оскуола директорын иитэр үлэҕэ солбуйааччыта Ольга Слепцова уонна И.Н. Барахов аатынан 1 оскуола директорын иитэр үлэҕэ солбуйааччыта Любомира Тихонова уонна ветеран учуутал Татьяна Ченохова тахсан, бу оскуолаларга үөрэммит Айталина Никифорованы, Саргылаана Барахованы, Алена Саввинова- Жиркованы, Мария Заболоцкая-Петрованы истиҥник эҕэрдэлээн туран, сэмэй бэлэхтэрин туттардылар уонна аны кыһын ыытыллаары турар Бараахап аатынан оскуола 150 сыллаах үбүлүөйүгэр күүтүүлээх мааны ыалдьыт буолалларыгар ыҥырдылар. Галина Васильева