Саха рок музыкатын ыйа: "Месяц культурного рока: 39 лет с Чолбон" бырайыак Үөһээ Бүлүүг...
Саха рок музыкатын ыйа: "Месяц культурного рока: 39 лет с Чолбон" бырайыак Үөһээ Бүлүүгэ дьоһуннаах тэрээһиннэри ыытар! Саха рок музыкатыгар уһулуччу суолу хаалларбыт «Чолбон» этно-рок бөлөх айымньытыгар анаммыт "Месяц культурного рока: 39 лет с Чолбон" бырайыак Үөһээ Бүлүү улууһугар бэлиэ тэрээһиннэри ыытар. Бу бырайыак "Култуура көҕүлээһиннэрин өйүүр Президент фондатын" гранын өйөбүлүнэн олоххо киирэр. Бырайыак чэрчитинэн бүгүн, алтынньы 23 күнүгэр, Үөһээ Бүлүүгэ "Киновер" киинэ саалыгар «Чолбон» этно-рок бөлөх айымньылаах үлэтин туһунан документальнай киинэни кэпсэтии, көрдөрүү дьоро тэрээһинэ ыытылынна. Режиссер Кыйаара Юмшанова, продюсердар, биһиги биир дойдулаахтарбыт, Сардана Саввина уонна Любовь Борисова, "Чолбон" айымньытын үйэтитэр сыаллаах оҥорбут, көрөөччү биһирэбилин ылбыт, дьон сүргэтин көтөҕөр киинэлэрин киэҥ эйгэҕэ таһаардылар. Бу киинэ алтынньы 1 күнүттэн Саха Сирин киинэ тыйаатырдарыгар көстө турар. "Месяц культурного рока: 39 лет с Чолбон" бырайыак салайааччыта Анна Артуровна Иванова быйыл Дойду Президенин култуура көҕүлээһиннэринэн өйүүр (ПФКИ) граныгар кыттан кыайыылаах буолбута. Бырайыак чэрчитинэн ый устата өрөспүүбүлүкэ таһымнаах саха рок музыкатыгар, "Чолбон" бөлөх айымньытыгар анаммыт дьоһуннаах тэрээһиннэр ыытыллаллар. Ол курдук, Дьокуускай куоракка алтынньы 9 күнүгэр биллиилээх худуоһунньук, биир дойдулаахпыт Дьулустан Бойтунов мультимедийнай выставката "Россия - моя история" түмэлгэ ыытыллыбыта, алтынньы 15 күнүгэр "Рок-толк" диэн саха рок музыкатын феноменын чинчийээччилэргэ билим кэмпириэнсийэтэ ыытыллыбыта. Онтон сарсын, алтынньы 24 күнүгэр, Үөһээ Бүлүүтээҕи Олоҥхо дьиэтигэр "Оҕо саас мичээрэ" өрөспүүбүлүкэтээҕи рок фестиваль ыытыллыаҕа! Манна өрөспүүбүлүкэ эдэр рок бөлөхтөрө кыттыыны ылан, бэйэлэрин талааннарын көрдөрүөхтэрэ, күөн-күрэхтэһиэхтэрэ. Кыайыылаах бөлөх Дьокуускай куорат "Триумф" спорт комплексыгар сэтинньи 6 күнүгэр ыытыллар "Чолбон" бөлөх тыыннаах кэнсиэригэр кыттыыны ылар чиэскэ тиксиэхтэрэ! Барыгытын сарсын, алтынньы 24 күнүгэр, киэһээ 18:00 чааска "Оҕо саас мичээрэ" рок фестиваль гала-концертыгар ыҥырабыт! Үөһээ Бүлүү улууһун дьаһалтатын пресс-сулууспата. #Чолбон #ПФКИ #МесяцКультурногоРока #Чолбон39 #ҮөһээБүлүү https://max.ru/id1407005163_gos